ބ. މާޅޮހުގައި ފުޓްސަލް ދަނޑެއް ހެދުމުގެ މަޝްރޫޢުގެ މަސައްކަތް ސަރުކާރުން އެމްޓީސީސީއާ ހަވާލުކޮށްފިއެވެ.
މި މަޝްރޫޢު ހަވާލުކުރުމަށް މިއަދު ބޭއްވުނު ރަސްމިއްޔާތުގައި، އެމްޓީސީސީގެ ފަރާތުން ސޮއިކުރެއްވީ ޑެޕިއުޓީ މެނޭޖިންގ ޑިރެކްޓަރ އަލްފާޟިލް ހަސަން މުޣްނީއެވެ. އަދި ޒުވާނުން ބާރުވެރިކުރުވުމާއި، މަޢުލޫމާތާއި ފަންނާ ބެހޭ ވުޒާރާއިން ސޮއިކުރެއްވީ ސްޓޭޓް މިނިސްޓަރ އަލްފާޟިލް އިބްރާހިމް އާމިރުއެވެ.
775 މީހުންގެ އާބާދީއެއް އޮންނަ ބ. މާޅޮހުގެ ރައްޔިތުން އާމްދަނީ ހޯދުމަށްޓަކައި މައިގަނޑު ގޮތެއްގައި ހަރަކާތްތެރިވަނީ ފަތުރުވެރިކަމުގެ ދާއިރާގައެވެ. މި ރަށުގައި ފުޓްސަލް ދަނޑެއް ހެދިގެން ދިއުމަކީ ރަށުގެ ޒުވާނުންނަށް މުނިފޫހިފިލުވުމާއި ދުޅަހެޔޮ ސިއްޙަތެއްގައި ހުރުމަށް ލިބޭނެ ފަހި ފުރުޞަތެކެވެ. މީގެ ސަބަބުން، ރަށުގައި އިޖުތިމާޢީ ގުޅުންތައް އިތުރަށް ބަދަހިވެގެން ދާނެކަމަށް ބެލެވެއެވެ.
މި މަޝްރޫޢުގެ ދަށުން، ބިންގަނޑު ކޮނުމާއި، ބެކްފިލިންގ މަސައްކަތާއި، 4,750 އަކަ މީޓަރުގެ ސަރަޙައްދެއް ކޮންޕެކްޓް ކުރުމުގެ މަސައްކަތް ހިމެނެއެވެ. މީގެ އިތުރުން، 274 ކޮންކްރީޓް ކާނުގަނޑު ހެދުމާއި، 23 ފެންހިންދާ ވަޅުގަނޑު ހެދުމާއި، 594 ގައު އެތުރުން ހިމެނެއެވެ. މި މަޝްރޫޢަކީ 2.3 މިލިއަން ރުފިޔާއަށް 90 ދުވަހުގެ ތެރޭގައި ނިންމުމަށް އެމްޓީސީސީއާ ހަވާލުކޮށްފައިވާ މަޝްރޫޢެކެވެ.
ވޭތުވެދިޔަ 43 އަހަރުގެ ތެރޭގައި އެމްޓީސީސީން ވަނީ ރާއްޖޭގެ އެކި ކަންކޮޅުތަކުގައި ޢުމްރާނީ ތަރައްޤީގެ ގިނަ މަޝްރޫޢުތަކެއް ހިންގާ ކާމިޔާބުކަމާއެކު ނިންމާފައެވެ. 1980 ވަނަ އަހަރު އެމްޓީސީސީ އުފެދުނީ ރާއްޖޭގެ ތަރައްޤީގެ ދަތުރުގެ މުހިންމު މަރުޙަލާއެއްގައެވެ. ކުންފުނި އުފެދުނީއްސުރެްސުރެ ރާއްޖޭގެ ޢުމްރާނީ ތަރައްޤީއާއި އިޖުތިމާޢީ ވަސީލަތްތައް ބިނާކުރުމުގައި އެމްޓީސީސީން ވަނީ މުހިންމު ދައުރެއް އަދާކޮށްފައެވެ.
