ޏ.ފުވައްމުލަކު ދަނޑިމަގު އަވަށުގެ ފުޓްބޯޅަ ދަނޑުގެ ސަބްބޭސް ހެދުމުގެ މަޝްރޫޢު ސަރުކާރުން އެމްޓީސީސީއާ ހަވާލުކޮށްފިއެވެ.
މި މަޝްރޫޢު ހަވާލުކުރުމަށް މިއަދު ބޭއްވި ރަސްމިއްޔާތުގައި، އެމްޓީސީސީގެ ފަރާތުން ސޮއިކުރެއްވީ ޑެޕިއުޓީ މެނޭޖިންގ ޑިރެކްޓަރ، އަލްފާޟިލް ހަސަން މުޣްނީއެވެ. އަދި، ޒުވާނުން ބާރުވެރިކުރުވުމާއި، މަޢުލޫމާތާއި ފަންނާ ބެހޭ ވުޒާރާގެ ފަރާތުން ސޮއިކުރެއްވީ ސްޓޭޓް މިނިސްޓަރ، އަލްފާޟިލް އިބްރާހިމް އާމިރުއެވެ.
14,200 މީހުންގެ އާބާދީއެއް އޮންނަ ފުވައްމުލަކަކީ ފުޓްބޯޅަ ކުޅެން ޝައުޤުވެރިކަން ހުންނަ ގިނަ އަދަދެއްގެ ޒުވާނުން ދިރިއުޅޭ ސިޓީއެކެވެ. މި މަޝްރޫޢުގެ މަސައްކަތް ނިމުމުން، ދަނޑިމަގު އަވަށުގެ ޒުވާނުންނަށް ފުޓްބޯޅަ ކުޅޭނެ ދަނޑެއް ލިބިގެންދާނެއެވެ. މި މަޝްރޫޢުގެ ސަބަބުން ޒުވާނުންގެ ދުޅަހެޔޮކަމަށާއި ރަށުގެ އިޖުތިމާޢީ ތަރައްޤީއަށް ހެޔޮ އަސަރުތަކެއް ކުރާނެކަމަށް ބެލެވެއެވެ.
މި މަޝްރޫޢުގެ ދަށުން، ބިންގަނޑު ކޮނުމާއި، ބެކްފިލިންގ މަސައްކަތާއި، 15,039 އަކަ މީޓަރުގެ ސަރަޙައްދެއް ކޮންޕެކްޓްކުރުމުގެ މަސައްކަތް ހިމެނެއެވެ. މީގެ އިތުރުން، 350 ކޮންކްރީޓް ކާނުގަނޑު ހެދުމާއި، 30 ފެންހިންދާ ވަޅުގަނޑު ހެދުމާއި، 750 ގައު އެތުރުން ހިމެނެއެވެ. މި މަޝްރޫޢަކީ 2.7 މިލިއަން ރުފިޔާއަށް 90 ދުވަސްތެރޭ ނިންމުމަށް އެމްޓީސީސީއާ ހަވާލުކޮށްފައިވާ މަޝްރޫޢުއެކެވެ.
1980 ވަނަ އަހަރު އުފެދުނު އެމްޓީސީސީން ވޭތުވެދިޔަ 43 އަހަރުގެ ތެރޭގައި ރާއްޖޭގެ އެކި ކަންކޮޅުތަކުގައި ޢުމްރާނީ ތަރައްޤީގެ ގިނަ މަޝްރޫޢުތަކެއް ހިންގާ ކާމިޔާބުކަމާއެކު ނިންމާފައިވެއެވެ. ކުންފުނި އުފެދުނީއްސުރެ ރާއްޖޭގެ ޢުމްރާނީ ތަރައްޤީއާއި އިޖުތިމާޢީ ވަޞީލަތްތައް ބިނާކުރުމުގައި އެމްޓީސީސީން ވަނީ މުހިންމު ދައުރެއް އަދާކޮށްފައެވެ.
