އެމެރިކާގެ 14 ސްޓޭޓެއްގެ އިއްތިހާދަކުން ޓިކްޓޮކްއާ ދެކޮޅަށް ދަޢުވާތަކެއް ހުށަހަޅައިފިއެވެ.
މި ދަޢުވާތަކުގައި ބުނެފައިވަނީ މި ސޯޝަލް މީޑިއާ ކުންފުނިން ޒުވާނުންނަށް ނުފޫޒު ފޯރުވާ، އެ އެޕްލިކޭޝަނަށް ދެވިހިފާ ފީޗަރތަކެއް ބޭނުންކޮށްގެން އެމީހުންގެ ނަފްސާނީ ދުޅަހެޔޮކަމަށް ގެއްލުން ދޭކަމަށެވެ.
މި ދަޢުވާތަކުން އެދެނީ އިސްލާހީ ފިޔަވަޅުތަކަކާއި މާލީ އަދަބުތަކެކެވެ. ޓިކްޓޮކްއަކީ ޗައިނާގެ ބައިޓްޑާންސްގެ މިލްކިއްޔާތުގައިވާ އެޕްލިކޭޝަނެކެވެ. އަދި މިހާރު މި އެޕްލިކޭޝަނަށް ވަނީ އެމެރިކާގައި މަނާކުރުމުގެ ބިރާ ކުރިމަތިލާންޖެހިފައިއެވެ.ކެލިފޯނިއާގެ އެޓަރނީ ޖެނެރަލް ރޮބް ބޮންޓާ ވިދާޅުވީ ޓިކްޓޮކުން ކުޑަކުދިންނަށް އަމާޒުކޮށް ބިއުޓީ ފިލްޓަރތަކާއި، އޮޓޯޕްލޭ ވީޑިއޯތަކާއި، އަދި "ލައިކް" ތަކުގެ ޒަރީއާއިން ދެވިހިފާ އާދަތަކެއް އުފެއްދުމަށް މަސައްކަތްކުރާ ކަމަށެވެ.
"ކުޑަކުދިންނަކަށް ދުޅަހެޔޮ އިމުތަކެއް ކަނޑައެޅުމުގެ ޤާބިލުކަމެއް ނުހުރެއެވެ،" ބޮންޓާ ވިދާޅުވިއެވެ.
މި ތުހުމަތުތަކަށް ޖަވާބުދެމުން، ޓިކްޓޮކުން ބުނެފައިވަނީ މިއީ އޮޅުވާލުމަށް ކުރެވޭ ތުހުމަތުތަކެއް ކަމަށެވެ. އެ ކުންފުނިން މި އެޕްލިކޭޝަންގެ އުމުރުގެ މިންގަނޑުތަކާއި ކުޑަކުދިންނަށް ޚާއްސަ ޕްރައިވަސީ ސެޓިންގްތައް ފަދަ ރައްކާތެރިކަމުގެ ފިޔަވަޅުތަށް ފާހަގަކުރިއެވެ. ނިއުޔޯކްގެ އެޓަރނީ ޖެނެރަލް ލެޓީޝިއާ ޖޭމްސް ވިދާޅުވީ ޓިކްޓޮކްގެ ޕްލެޓްފޯމަކީ ޒުވާނުންނަށް އެއްވެސް ވަރަކަށް ރައްކާތެރި ތަނެއް ނޫން ކަމަށެވެ.
މި ދަޢުވާތަކުން ޓިކްޓޮކަށް ކުރިމަތިވެފައިވާ ގޮންޖެހުންތައް ވަނީ އިތުރުވެގެންގޮސްފައިއެވެ. މިހާރު އެމެރިކާ ސަރުކާރުން އަންގާފައިވަނީ ޖެނުއަރީ މަހުގެ ކުރިން ޗައިނާގެ ޕޭރެންޓް ކުންފުނީގެ މިލްކުވެރިކަމުން ވަކިވުމަށް ނުވަތަ އެމެރިކާގައި މަނާކުރެވޭނެ ކަމަށެވެ. މިކަމުން 170 މިލިއަން އެމެރިކާގެ ޔޫޒާއަކަށް ޓިކްޓޮކް ބޭނުންކުރުމަށް ހުރަސްތަކެއް ކުރިމަތިވެދާނެއެވެ.
