2026 ވަނަ އަހަރާ ހިސާބުގައި އެޕަލްއިން ސްމާޓް ރިންގް ނުވަތަ އަނގޮޓިއެއް ނެރެ، އަލަށް ނެރެފައިވާ ސެމްސަންގް ގެލެކްސީ ރިންގްއާ ވާދަކުރަން އުޅޭކަމަށް ރީސާޗް ފާރމްއެއް ކަމައްވާ، ސީސީއެސް އިންސައިޓް އިން ލަފާކޮއްފިއެވެ.
މިއީ ހަޤީގަތަކަށް ވެއްޖެނަމަ، މިއީ މިއަހަރުގެ ކުރީކޮޅު ނެރުނު ވިޝަން ޕްރޯ ހެޑްސެޓަށްފަހު އެޕަލްއިން ނެރޭ އެންމެ ފުރަތަމަ އައު ޕްރޮޑަކްޓްއެވެ. މި އަނގޮޓި ފެތޭނީ އެޕަލްގެ ސިއްޙަތާ ގުޅޭ ޓެކްނޮލޮޖީތަކުތެރެއަށެވެ. މީގެ ތެރޭގައި އެޕަލް ވޮޗާއި އެއަރޕޮޑްސް ޕްރޯ ފަދަ ސިއްޙަތާ ގުޅޭ ޕްރޮޑަކްޓްތައް ހިމެނެއެވެ.
ސީސީއެސް އިންސައިޓްގެ ޗީފް އެނަލިސްޓް ބެން ވުޑް ގަބޫލުކުރާ ގޮތުގައި އެޕަލްގެ ސީއީއޯ ޓިމް ކުކްގެ ލެގަސީ ކަނޑައެޅިގެންދާނީ ކުންފުނިން ސިއްޙަތަށް ދޭ އަހައްމިއްޔަތުކަމުންނެވެ. އޭނާ ބުނި ގޮތުގައި ސްމާޓް އަނގޮޓިއަކުން އެޕަލްގެ މިހާރުގެ ޑިވައިސްތަކަށް އިތުރު ބާރެއް ލިބި، ހިތުގެ ވިންދު ބެލުން ފަދަ އިތުރު ސިއްޙީ ފީޗަރތައް ހިމެނޭނެއެވެ.
ވާދަވެރި ސެމްސަންގްގެ ގެލެކްސީ ރިންގް ނުކުތީ 2023 ގައި، 399 ޑޮލަރަށެވެ. ގެލެކްސީ ރިންގްަކީ އެ ކުންފުނީގެ ސިއްޙީ ޓެކްނޮލޮޖީގެ ދާއިރާ ފުޅާކުރުމުގެ ގޮތުން ނެރުނު ޑިވައިސްއެކެވެ.
ސްމާޓް އަނގޮޓިއެއް ވިއްކުމުގައި ސައިޒުގެ ތަފާތުތަކުގެ ސަބަބުން ގޮންޮންޖެހުންތަކެއް ހުރި ނަމަވެސް، ވުޑް ފާހަގަކުރި ގޮތުގައި އެޕަލްގެ ފުޅާ ރީޓެއިލް ނެޓްވޯކުން މި ކަންކަން ބެލެހެއްޓޭނެއެވެ. އަދި އޭނާ އިތުރަށް ބުނި ގޮތުގައި އެޕަލްއަކީ ފެންވަރު ރަނގަޅު، ޒަމާނީ ޑިވައިސްތައް އުފެއްދުމަށް މަޝްހޫރު ކުންފުންޏަކަށް ވުމުން، މި އަނގޮޓި ވެގެންދާނީ މީހުން ގަންނަން ބޭނުންވާ އެކްސެސަރީއަކަށާއި ސްޓޭޓަސް ސިމްބަލްއަކަށެވެ. ސްމާޓް އަނގޮޓިއަކުން އެޕަލްގެ އީކޯސިސްޓަމް އިތުރަށް ވަރުގަދަވެ، ވަފާތެރި ކަސްޓަމަރުން ހިފަހައްޓައިދޭނެއެވެ.
