ރައީސުލްޖުމްހޫރިއްޔާ ޑޮކްޓަރ މުހައްމަދު މުއިއްޒު، އިންޑިއާގެ ކަރްނާޓަކާ ސްޓޭޓްގެ ގަވަރުނަރު ހިޒް އެކްސެލެންސީ ތަވާރް ޗަންދު ގެހެލޫޓާ ބައްދަލުކުރައްވައިފިއެވެ.
ރައީސްގެ އަރިހުގައި، އަނބިކަނބަލުން މެޑަމް ސާޖިދާ މުހައްމަދާއި ދިވެހި ސަރުކާރުގެ މަތީ ފަންތީގެ ވަފުދެއް ބައިވެރިވެވަޑައިގެންނެވިއެވެ.
މި ބައްދަލުކުރެއްވުމުގައި ގަވަރުނަރު ދެއްކެވި ވާހަކަފުޅުގައި، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު އިންޑިއާއަށް ކުރައްވަމުން ގެންދަވާ ފުރަމާނަ ދަތުރުފުޅުގެ މުހިންމުކަމާއި، އަވަށްޓެރި ދެޤައުމުގެ ގޮތުގައި އޮތް ދިވެހިރާއްޖެއާއި އިންޑިއާގެ ދެމެހެއްޓެނިވި ގާތް ގުޅުމުގެ މައްޗަށް އަލިއަޅުއްވާލެއްވިއެވެ.
ރައީސް ވަނީ އިންޑިއާ ސަރުކާރުން ދެއްވަމުންގެންދަވާ ދީލަތި މެހްމާންދާރީއަށް ޝުކުރު އަދާކުރައްވާފައެވެ. ރައީސްގެ ވާހަކަފުޅުގައި، އެމަނިކުފާނުގެ މި ދަތުރުފުޅުގައި ބޭއްވެވި މަޝްވަރާތަކަކީ ބިނާކުރަނިވި މަޝްވަރާތަކެއް ކަމަށާއި، ހާއްސަކޮށް ނިއުދިއްލީ އާއި މުމްބާއީގައި ކުރިއަށް ދިޔަ ބިޒްނަސް ފޯރަމްތަކުގެ ކާމިޔާބީގެ މައްޗަށް އަލިއަޅުއްވާލައްވައި، މިއަދު ބެންގަލޫރުގައިވެސް އެފަދަ އިތުރު ފޯރަމެއް ބޭއްވުމަށް ހަމަޖެހިފައިވާކަމަށް ވިދާޅުވިއެވެ.
ކަރްނާޓަކާ ސްޓޭޓްގެ ގަވަރުނަރ، ރައީސްއާއެކު ކުރިއަށް ގެންދެވި ބައްދަލުކުރެއްވުމުގައި، އެ ސްޓޭޓްގެ ޗީފް މިނިސްޓަރ ހިޒް އެކްސަލަންސީ ސިދާރަމަޔާވެސް ބައިވެރިވެވަޑައިގެންނެވިއެވެ. މި ބައްދަލުކުރެއްވުމުގައި ޗީފް މިނިސްޓަރ ސިދާރަމަޔާ ދެއްކެވި ވާހަކަފުޅުގައި، ރާއްޖެއާއި ކަރްނާޓަކާއާ ދެމެދުގައި އޮތް ގާތް ގުޅުމުގެ މައްޗަށް އަލިއަޅުއްވާލައްވައި، ތައުލީމާއި ސަގާފަތާ ގުޅުން ހުރި އެކްސްޗޭންޖް ޕްރޮގްރާމްތައް މެދުވެރިކޮށް ތަޖުރިބާ ހިއްސާކުރެއްވުމަށް ތައްޔާރަށް ހުންނެވިކަމުގައި ވިދާޅުވިއެވެ.
މި ބައްދަލުކުރެއްވުން ނިންމަވާލެއްވީ ދޭދޭ ގުޅުންތައް އިތުރަށް ބަދަހިކުރެއްވުމަށް ދެ ބޭފުޅުން ވައުދުވެވަޑައިގަންނަވަމުންނެވެ.
ރައީސްގެ ދެކަނބަލުން އިންޑިއާއަށް ކުރައްވާ މި ދަތުރުފުޅަކީ އިންޑިއާގެ ރައީސް ދުރޫޕަދީ މުރުމޫގެ ދަޢުވަތަކަށް ކުރައްވާ ދަތުރުފުޅެކެވެ. މި ދަތުރުފުޅުގައި ރައީސްގެ ދެކަނބަލުންގެ އަރިހުގައި ސަރުކާރުގެ މަތީ ފަންތީގެ ވަފުދެއް ބައިވެރިވެވަޑައިގަންނަވައެވެ.
