ފަލަސްތީނުގެ ޣައްޒާއަށް ޒަޔަނިސްޓް އިސްރާއީލުން ހަމަލާދޭން ފެށުމަށްފަހު ޔޫރަޕުގައި އިސްލާމްދީން ގަބޫލުކުރާ މީހުންގެ އަދަދު 400 އިންސައްތަ އިތުރުވެފައިވާކަމަށް ގްލޯބް އައި ނިއުސްއިން ރިޕޯޓްކޮށްފިއެވެ.
ސޯޝަލް މީޑިއާގައި ފެތުރިފައިވާ ވީޑިއޯތަކުން ދައްކާގޮތުގައި ހުޅަނގުގެ ގިނަ މީހުން ފަލަސްޠީނު ރައްޔިތުންގެ ކެތްތެރިކަމާއި ސާބިތުކަން ދެނެގަތުމަށްޓަކައި ޤުރުއާން ކިޔަން ޝައުޤުވެރިކަން ފާޅުކުރަމުންދެއެވެ. މި ކަމުގެ ސަބަބުން އާބާދީގެ ނިސްބަތަށް ބޮޑެތި ބަދަލުތަކެއް އަންނާނެ ކަމަށް ބެލެވެއެވެ.
ޕިއު ރިސާރޗް ސެންޓަރުން ހެދި ދިރާސާއެއްގައި ލަފާކޮށްފައިވާ ގޮތުގައި 2050 ވަނަ އަހަރުގެ ކުރިން ޖަރުމަނުވިލާތުގެ އާބާދީގެ 20 އިންސައްތަ މުސްލިމުންނަށް ވެގެންދާނެއެވެ. ފަރަންސޭސިވިލާތުގެ 18 އިންސައްތަ އަދި އިނގިރޭސިވިލާތުގެ 17 އިންސައްތަވެސް 2050ގެ ކުރިން މުސްލިމުންނަށް ވެގެންދާނެކަމަށް މި ރިޕޯޓުގައި ބުނެފައިވެއެވެ. ދިރާސާވެރިން ލަފާކުރާ ގޮތުގައި ގާތްގަނޑަކަށް 100 އަހަރު ތެރޭގައި ސުވިޑަން، ފަރަންސޭސިވިލާތް އަދި ގްރީސްގެ އާބާދީގެ މެޖޯރިޓީ މުސްލިމުންނަށް ވުން އެކަށީގެންވެއެވެ،
ޖަރުމަނުވިލާތުގެ ކުރީގެ ސަލާމަތީ އޮފިޝަލެއް ކަމަށްވާ ހާންސް-ޖޯޖް މާސެން ހުޅަނގުގެ އަހުލުވެރިންނަށް އިންޒާރުދީފައިވާ ގޮތުގައި 2200 ވަނަ އަހަރާ ހަމައަށް ޔޫރަޕުގެ އާބާދީގެ ގިނަ މީހުންނަކީ މުސްލިމުންނަށް ވެދާނެއެވެ. އަދި މިކަމުގެ ސަބަބުން ޔޫރަޕުގެ އާދަކާދަތައް ދެމެހެއްޓުމަށް ގޮންޖެހުންތަކެއް ކުރިމަތިވެދާނެއެވެ.
ޔޫރަޕުގެ ޤައުމުތަކުގެ ތެރެއިން އެންމެ ގިނަ މުސްލިމުން ދިރިއުޅޭނީ ފަރަންސޭސިވިލާތުގައި ކަމަށް ބެލެވެއެވެ. މިހާރުވެސް ފަރަންސޭސިވިލާތުގެ އާބާދީގެ 10 އިންސައްތައަކީ މުސްލިމުންކަމަށް އެޤައުމުގެ އިންސްޓިޓިއުޓް އޮފް ސްޓެޓިސްޓިކްސް އެންޑް އެކޮނޮމިކް ސްޓަޑީޒްއިން ބުނެއެވެ.
ﷲ އަކީ ކޮންމެ ކަމަކަށް ކުޅަދުން ވަންތަ އިލާހެވެ.