އެމެރިކާގައި ފުރަތަމަ ފަހަރަށް ފުލުހުންގެ ބޭނުމަށް ޓެސްލާ ސައިބަރޓްރަކެއް ދެކުނު ކެލިފޯނިއާގެ އަރވިން ޕޮލީސް ޑިޕާރޓްމަންޓް ގަނެފިއެވެ.
އަރވިން ޕޮލީސް ޑިޕާރޓްމަންޓްއިން މި ހައިޓެކް އުޅަނދަށް 153،000 ޑޮލަރު ޚަރަދުކޮށްފައިވެއެވެ. ސޯޝަލް މީޑިއާގައި ހާމަކުރި ގޮތުގައި، މި ސައިބަރޓްރަކް ބޭނުންކުރާނީ މައިގަނޑު ގޮތެއްގައި މަސްތުވާތަކެއްޗާ ދެކޮޅަށް ހޭލުންތެރިކުރުމުގެ ޕްރޮގްރާމް (ޑީ.އޭ.އާރް.އީ) ގެ ދަށުން ސްކޫލްތަކުގައި ހިންގާ ހަރަކާތްތަކުގައެވެ.
މި އިދާރާއިން ބުނެފައިވަނީ، އާންމުކޮށް ފުލުހުން ގެންގުޅޭ 116،000 ޑޮލަރުގެ ފޯޑް ޕޮލިސް އިންޓަސެޕްޓަރއަށްވުރެ އަގުބޮޑު މި އުޅަނދު 10 އަހަރާ ހަމައަށް ބޭނުންކުރެވޭނެ ކަމަށެވެ. އާންމު ފުލުސް ޕެޓްރޯލްގައި ބޭނުން ނުކުރި ނަމަވެސް، ކުއްލި ހާލަތްތަކުގައި މި ސައިބަރޓްރަކް ބޭނުންކުރެވޭނެއެވެ.
އަރވިން ޕޮލީސް ޑިޕާރޓްމަންޓްގެ ސާޖަންޓް ކޭރީ ޑޭވިސް ވިދާޅުވި ގޮތުގައި މި ސައިބަރޓްރަކް ގަނެފައިވަނީ ކުރީގެ ޑީ.އޭ.އާރް.އީ އުޅަނދުގެ ބަދަލުގައެވެ. އަދި ދުރު މުސްތަޤުބަލުގައި މި އުޅަނދުގެ ސަބަބުން ތެލުގެ ޚަރަދު ކުޑަވާނެ ކަމަށް އުންމީދުކުރެވެއެވެ.
ޓެސްލާގެ ސައިބަރޓްރަކަށް ގިނަ ގޮންޖެހުންތަކާ ކުރިމަތިވެފައިވީ ނަމަވެސް، އަރވިން ފުލުހުން މި އުޅަނދުގެ ޚާއްޞަ ދައުރާމެދު އިތުބާރު ކުރެއެވެ.
މި އުޅަނދުގެ އަގާއި މިކްސްޑް ރިވިއުތަކުގެ ސަބަބުން އޮންލައިންކޮށް ބަހުސްތަކެއް ހިނގަމުންދާ ނަމަވެސް، އަރވިން ފުލުސް އިދާރާއިން އުންމީދުކުރަނީ ސްކޫލްތަކަށް ކުރާ ޒިޔާރަތްތަކުގައި މި އުޅަނދަށް ރަނގަޅު ސަމާލުކަމެއް ލިބޭނެ ކަމަށެވެ.
