އިންޑިއާގެ ބެންގަލޫރުގައި ސެއިންޓް ޖޯސެފް ޔުނިވަރސިޓީގެ ފާހަގަކޮށްލެވޭ އިސްދަރިވަރަކަށް ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުހައްމަދު ވީތީ އެކަމާ އުފާކުރައްވާކަމުގައި އެ ޔުނިވަރސިޓީގެ ވައިސް ޗާންސެލަރ ވިދާޅުވެއްޖެއެެވެ.
ސެއިންޓް ޖޯސެފް ޔުނިވަރސިޓީގެ ވައިސް ޗާންސެލަރ މިހެން ވިދާޅުވީ އެ ޔުނިވަރސިޓީއަށް އެކަމަނާ ކުރެއްވި ޒިޔާރަތުގައި ބޭއްވި ބައްދަލުވުމުގައެވެ.
ޔުނިވަރސިޓީއަށް ވަޑައިގަތުމުން އެކަމަނާއަށް މަރުހަބާ ވިދާޅުވީ، އެ ޔުނިވަރސިޓީގެ ވައިސް ޗާންސެލަރ، ރެވެރެންޑް ޑޮކްޓަރ ވިކްޓަރ ލޯބޯ އާއި ރަޖިސްޓްރާ، ޕްރޮފެސަރ ޑޮކްޓަރ މެލްވިން ކޮލާކޯއެވެ.
މީގެއިތުރުން ވައިސް ޗާންސެލަރ ވަނީ ރައީސުލްޖުމްހޫރިއްޔާގެ އަނބިކަނބަލުން ސެއިންޓް ޖޯސެފް ޔުނިވަރސިޓީއަށް ޒިޔާރަތްކުރެއްވީތީ، އެކަމަނާއަށް ޝުކުރު އަދާކުރައްވާފައެވެ.
މި ޒިޔާރާތުގައި މެޑަމް ދެއްކެވި ވާހަކަފުޅުގައި، ސެއިންޓް ޖޯސެފް ޔުނިވަރސިޓީއަށް ޒިޔާރަތްކުރެއްވީ އުފަލާއެކުގައިކަން ފާހަގަކުރައްވައި، އެ ޔުނިވަރސިޓީ އަކީ އެކަމަނާގެ މަތީ ތައުލީމުގެ ދަތުރު ފެއްޓެވި މަންޒިލްކަމުގައި ވިދާޅުވިއެވެ. އަދި ސެއިންޓް ޖޯސެފް ޔުނިވަރސިޓީއަކީ އެކަމަނާގެ ހިތްޕުޅުގައި ހާއްސަ މަގާމެއް ދެވިފައިވާ ތައުލީމީ މުއައްސަސާއެއްކަމަށްވެސް އެކަމަނާ ވިދާޅުވިއެވެ.
ޔުނިވަރސިޓީ ދައުރުގެ ހަނދާންތައް އާކުރައްވަމުން، އެ ދައުރުގައި ލިބިވަޑައިގެންނެވި ރަހުމަތްތެރިންނާއި އޭރު އިރުޝާދު ދެއްވި މުރުޝިދުން އެކަމަނާގެ ހަޔާތްޕުޅުގައި ތަބްދީލީ ދައުރެއް އަދާކުރެއްވި ކަމަށް އެކަމަނާ ވިދާޅުވިއެވެ.
އަދި ތައުލީމު ހާސިލްކުރެއްވުމަށް ބެންގަލޫރުގައި ދިރިއުޅުއްވި އިރު، އެ ސިޓީ ފާހަގަކުރެއްވުނީ، ސަގާފީ އަދި ބަހަވީ ސިންދަފާތު ފެންނަ، ދިރުންހުރި ތަނެއްގެ ގޮތުގައިކަމަށްވެސް އެކަމަނާ ވިދާޅުވިއެވެ.
