ބާރަ ޕިކަޕް ބެޓެރީ ވަގަށް ނެގި ކަމުގެ ތުހުމަތުގައި 2 މީހަކު ހައްޔަރުކޮށްފިއެވެ.
މި މައްސަލައާ ގުޅިގެން ހައްޔަރުކޮށްފައި ވަނީ ސ. މަރަދޫ ފޭދޫ މާކަރީ ލައިޓް، އުމުރުން 32 އަހަރުގެ އަލީ އަހްސަން އަދި ސ.ފޭދޫ އަނަސް، އުމުރުން 43 އަހަރުގެ މުހައްމަދު ނީޒާދުއެވެ.
ފުލުހުންގެ މީޑީއާ ގްރޫފަށް ފޮނުވި މެސެޖެއްގައި ބުނީ މިއަދު ހެނދުނު 6:45 ކަންހާއިރު، ފަރީދީމަގާއި ޗާންދަނީ މަގު ގުޅޭ ހިސާބުން ދުއްވާފައި ދިޔަ ޕިކަޕްގައި ތިބި ބަޔަކާ މެދު ތުހުމަތު ކުރެވިގެން ބަލާ ފާސްކުރުމުގެ ތެރޭގައި ޕިކަޕުގެ ބެޓެރިކަތަކެއް ފެނިފައިވާ ކަމަށެވެ.
ޕިކަފު ބަލައިފާސްކުރުމުގެ ތެރޭގައި ވަގަށް ނަގާފައިވާ ކަމަށް ބެލެވޭ 12 ޕިކަޕް ބެޓެރީ ފެނިފައިވާ ކަމަށްވެސް ފުލުހުން ވަނީ ބުނެފައެވެ.
ފުލުހުން އިތުރަށް ބުނީ މި މައްސަލަ ތަހުގީގު ކުރަމުންދާ ކަމަށެވެ.
