އިނގިރޭސި ވިލާތުގެ ގައުމީ ޓީމުގެ އިންޓަރިމް މެނޭޖަރުގެ ގޮތުގައު ދާދި ފަހުން އައްޔަނު ކުރި ލީ ކާސްލީގެ ޓެކްޓިކްސް, ޕެޕް ގާޑިއޯލާގެ ސްޓައިލާ ވަރަށް ވައްތަރުކަމަށް އެ ޓީމުގެ ޑިފެންޑަރު ޖޯން ސްޓޯންސް ބުނެފިއެވެ.
މިއަދު ނޭޝަންސް ލީގުގެ ގްރޫޕު ސްޓޭޖުގައި ގްރީސްއާ ދެކޮޅަށް އިނގިރޭސި ވިލާތުން ނިކުންނަ މެޗުގެ ކުރިން ވާހަކަދައްކަމުން ސްޓޯންސް ބުނީ ކާސްލީގެ ތަފާތު ޓެކްޓިކްސް ހުރިކަމުގައިވިއަސް ގާޑިއޯލާގެ ސްޓައިލާ ވައްތަރުކަމަށް އޭނާ ގަބޫލު ކުރާ ކަމަށެވެ.
"ކާސްލީގެ ޓެކްޓިކްސް ގާޑިއޯލާގެ ސްޓައިލާ އެއްގޮތް ކަމެއް ހުރޭ. ކޮންމެ ކޯޗެއްގެ ވެސް ތަފާތު ގޮތްގަނޑެއް ހުންނާނެ. އެކަމަކު އެއް މަގުސަދަކަށް މަސައްކަތް ކުރާ ބަޔެއްގެ ވިސްނުމުގައި އެއްގޮތް ކަމެއް ހުންނާނެ ކަމަށް އަހަރެން ދެކެނީ" ރިޕޯޓަރުންނާ ވާހަކަދައްކަމުން ސްޓޯންސް ބުންޏެވެ.
މިއަދުގެ މެޗަށް އިނގިރޭސި ވިލާތުން ނިކުންނައިރު, އެ ޓީމުގެ ފުރަތަމަ ކެޕްޓަން ކަމުގައިވާ ހެރީ ކޭންގެ ފަޔަށް ދިމާވި އިންޖަރީއެއްގެ ސަބަބުން މެޗުގައި ބައިވެރިނުވާތީ, އެ ޓީމަށް ކެޕްޓަންކަން ކޮށްދިނުމަށް ހަމަޖެހިފައިވަނީ ސްޓޯންސްއެވެ. އެއާއެކު މިއަދު މެޗަކީ, އިނގިރޭސި ވިލާތަށް 81 މެޗު ކުޅެދީފައިވާ ސްޓޯންސް އޭނާގެ ގައުމީ ޓީމަށް ކެޕްޓަންކަން ކޮށްދޭ ފުރަތަމަ މެޗެވެ.
ކާސްލީގެ އިރުޝާދުގެ ދަށުން މިއަދުގެ މެޗަށް އިނގިރޭސި ވިލާތުން ނިކުންނައިރު މިއީ އެ ޓީމުން އޭނާގެ ބެލުމުގެ ދަށުން ކުޅޭ ތިންވަނަ މެޗެވެ. އިނގިރޭސި ވިލާތުގެ ޓީމުން ކާސްލީގެ ބެލުމުގެ ދަށުން ކުޅުނު ފުރަތަމަ ދެ މެޗު ވެސް ކާމިޔާބު ކޮށްފައިވާތީ އެ ޓީމާ މެދު ސަޕޯޓަރުން ކުރާ އުއްމީދު ވަނީ އިތުރަށް ބޮޑުވެފައެވެ.
