ދަރުމަވަންތަ ހޮސްޕިޓަލުގައި ޤާއުމްކުރެވުނު ޒަމާނީ އޮޕަރޭޓިންގ ތިއޭޓަރުން ޚިދުމަތްދޭން ފަށައިފިއެވެ.
ހޮސްޕިޓަލުގެ 11 ވަނަ ފަންގިފިލާގައި އަލަށް ހުޅުވާލެވުނު މި ފެސިލިޓީގައި ހިތާއި، ސިކުނޑިއާއި އަދި މައިބަދައާ ގުޅުންހުރި ބޮޑެތި އޮޕަރޭޝަންތައް ކުރެވޭނެއެވެ.
އެކި ގޮންޖެހުންތަކާ ހުރެ 5 އަހަރު ވަންދެން ބޭނުން ނުކުރެވި ހުރި މި ޒަމާނީ އޮޕަރޭޓިންގ ތިއޭޓަރ މިހާރު ވަނީ ހޮސްޕިޓަލުގެ ޤާބިލުކަން އިތުރުކޮށްދީފައެވެ.
ހުކުރު ދުވަހުން ފެށިގެން މި އެޑްވާންސްޑް ހައިބްރިޑް އޮޕަރޭޓިންގ ތިއޭޓަރާއި ކެތީޓަރ ލެބުގައި ސަރޖިކަލް އޮޕަރޭޝަންތައް ވަނީ ރަސްމީކޮށް ފަށައިފައެވެ. މި ފެސިލިޓީގައި ސިކުނޑިއާއި ހިތުގެ އޮޕަރޭޝަންތަކާއި، ހަށިގަނޑުގެ އެކި ތަންތަނުގައި ލޭގަނޑުވުމުގެ ސަބަބުން ހަދަންޖެހޭ އެކި ޕްރޮސީޖަރތަކާއި އެހެނިހެން ނާޒުކު ފަރުވާތައް ކުރެވޭނެއެވެ.
ޑީއެޗް-11 ފަންގިފިލާގައި 10 ޕޭޝަންޓުންނަށް ޖާގަ ލިބޭ ޚާއްޞަ އައިސީޔޫއެއް ވެސް ހުންނާނެއެވެ. މީގެ ސަބަބުން ބޮޑެތި އޮޕަރޭޝަންތަކަށްފަހު ރިކަވަރީގައި ތިބޭ މީހުން މޮނިޓާކުރަން ފަސޭހަވެގެންދާނެއެވެ. އަދި މިކަމަށް މިހާރުވެސް ސްޕެޝަލިސްޓް ނަރުހުންގެ ޓީމެއް ވަނީ ތަމްރީނުކުރެވިފައިއެވެެ. އަދި އިތުރު ނަރުހުން ތަމްރީނުކުރުމުގެ މަސައްކަތްވެސްދަނީ ކުރަމުންނެވެ.މީގެ އިތުރުން، ޖުލައި މަހު މަޝްހޫރު ނިއުރޯ ސަރޖަން ޑރ. ޢަލީ ނިޔާފް ގުޅުމާއެކު ހޮސްޕިޓަލުގެ ނިއުރޯ ޑިޕާޓްމަންޓް ވަނީ ވަރަށް ބޮޑަށް ވަރުގަދަވެފައެވެ. ރާއްޖެއިން ބޭރުން ފަރުވާ ހޯދުމަށް ދިވެހީން އާއްމުކޮށްދާންޖެހޭ އެކި ދާއިރާތައް އައިޖީއެމްއެޗްގައި ދަނީ ތަރައްޤީކުރުމުގެ މަސައްކަތްކޮށް، ރައްޔިތުންގެ އިތުބާރު އުފެއްދުމަށް މަސައްކަތްކުރަމުންނެވެ. މިއީ ހޮސްޕިޓަލުގެ ޞިއްޙީ ޚިދުމަތްތައް ފުޅާކުރުމަށް ކޮންމެހެން ބޭނުންވާ ފިޔަވަޅެކެވެ.
