ދުނިޔޭގެ ނަފްސާނީ ދުޅަހެޔޮކަމުގެ ދުވަސް ފާހަގަ ކުރުމުގެ ގޮތުން ދަމަނަ ވެށިން ހާއްސަ ސެޝަންތަކެއް ކުރިއަށް ގެންގޮސްފިއެވެ.
އެކިއެކި އޮފީސްތަކުގައި ކުރިއަށް ގެންދިޔަ މި ސެޝަންތަކުގެ މަގްސަދަކީ މުވައްޒަފުން މަސައްކަތުގެ މާހައުލުން ދުރުކޮށް, ހިތްހަމަޖައްސާލާ, މުވައްޒަފުންގެ މަސައްކަތުގެ މޯޓިވޭޝަން ރަނގަޅުކޮށް, މަސައްކަތުގެ މާހައުލުގައި ހުރި ނަފްސާނީ ސިއްޙަތައް އަސަރުކުރުވާ ކަންކަން ހިއްސާކޮށް, އެ ކަންކަމުން އަރައިގަތުމަށް ކުރެވިދާނެ ކަންކަމާއި ގުޅޭގޮތުން މައުލޫމަތު ދިނުމެވެ.
ނަފްސާނީ ސިއްހަތަށް ކޮންމެ އަހަރެއްގެ އޮކްޓޯބަރ މަހުގެ 10 ވަނަ ދުވަސް ހާއްސަކޮށްފައިވާއިރު މި ދުވަހާ ގުޅިގެން ހޭލުންތެރިކުރުމުގެ ގިނަ ހަރަކާތްތަކެއް ހަފްތާއަށް ބަހާލާއިގެން ކުރިއަށް ގެންދިއުމަށް މެންޓަލް ހެލްތު ޑިޕާޓްމަންޓާއި، ދަމަނަވެށިން ވަނީ ނިންމާފައެވެ.
މި އަހަރު ނަފްސާނީ ސިއްހަތުގެ ދުވަހުގެ ޝިއާރުގެ ގޮތުގައި ދުނިޔޭގެ ސިއްހަތު ޖަމިއްޔާއިން ކަނޑައަޅާފައިވަނީ "މެންޓަލް ހެލްތު އެޓް ވޯކް" މި ޝިއާރެއެވެ.
