އިސްލާމީ މަރުކަޒުގެ މުންނާރުގެ ކައިރީގައިވާ މަސްފެންގަނޑު މަރާމާތުކުރުމުގެ މަސައްކަތް ފަށިއްޖެކަމަށް ދައުލަތުގެ ކަރަންޓު ކުންފުނި، ސްޓޭޓް އިލްކްޓްރިކް ކޮމްޕެނީ ލިމިޓެޑް (ސްޓެލްކޯ) ގެ މެނޭޖިންގ ޑިރެކްޓަރ ޙުސައިން ފަހުމީ ވިދާޅުވެއްޖެއެވެ.
މެނޭޖިންގ ޑިރެކްޓަރ ފަހުމީ މިކަން އިއުލާނުކުރެއްވީ އެކްސް މެދުވެރިކޮށް ކުރެއްވި ޕޯސްޓެއްގައިއެވެ.
"މި ލޮބުވެތި ތަރިކަ އޭގެ ކުރީގެ ހާލަތަށް އަނބުރާ ގެނައުމަށާއި، އޭގެ ތާރީޚީ އަދި ސަގާފީ މުހިންމުކަން މުޖުތަމަޢުއަށްޓަކައި ދެމެހެއްޓުމަށް ސްޓެލްކޯއިން މަސައްކަތްކުރާނަން" ފަހުމީ ވިދާޅުވިއެވެ.
މި އިޢުލާނު ކުރެއްވީ ފާއިތުވި ހަފްތާގައި ޑިރެކްޓަރ ފަހުމީ އާއި އިސްލާމީ ކަންތައްތަކާބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދާ ބައްދަލުކުރެއްވުމަށްފަހުގައެވެ. މި ބައްދަލުވުމުގައި ސްޓެލްކޯއިން ވަނީ ފެންގަނޑު އައުކުރުމަށް ޝައުޤުވެރިކަން ފާޅުކުރައްވާފައެވެ. އަދި މިފަދަ ދީނީ އަދި ސަގާފީ ތަންތަން ދެމެހެއްޓުމުގެ މުހިންމުކަން ފާހަގަކުރައްވާފައިވެއެވެ. އެއްބާރުލުމުގެ ފުރުޞަތުތައް ބައްލަވާލެއްވި ކަމަށްޓަކައި ފަހުމީ ވަނީ ވަޒީރަށް ޝުކުރު އަދާކުރައްވާފައެވެ.
"އިސްލާމީ މަރުކަޒުގެ މުންނާރުގެ ތިރީގައި ވާ ފެންގަނޑަކީ ތާރީހީ މުހިންމު ތަނެއް، އެ ތަނަކީ ވަރަށް ހިތްގައިމު ތަނެއްގެ ގޮތުގައި ދެމިއޮތުމަށް އަޅުގަނޑުމެން މަސައްކަތް ކުރަން. މިތަން އަލުން އިއާދަކޮށް، މިތަން ތަރައްގީ ކުރުމަށް ތި ވުޒާރާގެ ޓީމާ ގުޅިގެން މަސައްކަތް ކުރާނެ ކަމަށް އުއްމީދު ކުރަން،". އޭނާ ވިދާޅުވިއެވެ
އިސްލާމީ މަރުކަޒުގެ މުންނާރު ކައިރީ މަސްފެންގަނޑު މަރާމާތު ކުރާނެ ކުންފުންޏެއް ހޯދަން މީގެ ކުރިން އިއުލާން ވެސް ކޮށްފައިވެއެވެ. އެހެން ނަމަވެސް މާލީ ހާލަތާއި ގުޅިގެން އެ އިއުލާން ވަނީ ބާތިލް ކޮށްފައިއެވެ.
