ޖުޕިޓާގެ ހަނދެއް ކަމުގައިވާ "ޔޫރޮޕާ" އަށް ފޮނުވުމަށް ޓަކައި ނޭޝަނަލް އެއޮރޯނޮޓިކްސް އެންޑް ސްޕޭސް އެޑްމިނިސްޓްރޭޝަން (ނާސާ) އިން ސްޕޭސްކްރާފްޓެއް ލޯންޗު ކޮށްފިއެވެ.
މި ދިޔަ ހޯމަ ދުވަހު އެމެރިކާގެ ފްލޮރިޑާގައި ލޯންޗު ކުރި މި ސްޕޭސްކްރާފްޓްގެ އަމާޒަކީ, ޔޫރޮޕާ ހަނދަކީ ދިރޭ މަޚްލޫގަކަށް އުޅެވޭނެ ފަދަ ވެށްޓެއް ލިބިގެންވާ ހަނދެއްތޯ ބަލާ ދިރާސާކުރުމެވެ.
މި ދިރާސާތައް ކުރުމަށް ޓަކައި ނާސާއިން ލޯންޗު ކުރި "ޔޫރޮޕާ ކްލިޕާ ސްޕޭސްކްރާފްޓް" ބިމުން ހިއްލާލީ ކަނަވެރަލް ކޭޕްގައި ހުންނަ ކެނެޑީ ސްޕޭސް ސެންޓާގައި ސްޕޭސް އެކްސް ފެލްކަން ހެވީ ރޮކެޓެއްގައެވެ. މި ސްޕޭސްކްރާފްޓް, ޖުބިޓާގެ އޯބިޓަށް ވަންނާނެ ކަމަށް ލަފާ ކުރެވެނީ 2030 ވަނަ އަހަރުގައެވެ. ފަސް އަހަރުގެ މި ދިގު ދަތުރުގެ ރާސްތާއަކީ 1.8 ބިލިއަން މޭލެވެ.
ޔޫރޮޕާ ކްލިޕާ ސްޕޭސްކްރާފްޓަކީ ޕެލެނެޓަރީ މިޝަންއަކަށް ނާސާއިން އުފެއްދި އެންމެ ބޮޑު ސްޕޭސްކްރާފްޓެވެ. ދިގު މިނުގައި 100 ފޫޓު އަދި ފުޅާ މިނުގައި 58 ފޫޓު ހުންނަ މި ސްޕޭސްކްރާފްޓަކީ ބަރުދަނުގައި 6,000 ކިލޯ ހުންނަ ވެހިކަލެކެވެ.
ޔޫރޮޕާގައި ދިރިއުޅުން ގާބިލުތޯ ބެލުމަށް ނާސާއިން ހިންގާ މި މިޝަނާ ބެހޭ ގޮތުން ވާހަކަދައްކަމުން ނާސާގެ އެސޯސިއޭޓް އެޑްމިނިސްޓްރޭޓާ ޖިމް ފްރީ ބުނާ ގޮތުގައި މި މިޝަންއަށް ޔޫރޮޕާ ޚިޔާރު ކުރި ސަބަބަކީ, ދުނިޔެއަށްފަހު އަހަރެމެންގެ ސޯލަރ ސިސްޓަމްގައި ދިރިހުރި އެއްޗަކަށް އުޅެން އެންމެ އެކަށީގެންވާ ތިމާވެށްޓެއް ލިބިގެންވާ ތަނަކީ ޔޫރޮޕާ ކަމުގައި ވާތީއެވެ.
