ޤުރުއާން އުނގަންނައިދިނުމަށާއި، ޤުރުއާނުގެ ޢިލްމު ފެތުރެއްވުމަށްޓަކައި ފެށި މިސްކިތު ޤާރީ ކުލާސްތަކުގެ ސަބަބުން މިސްކިތްތަކަށް ދިރުން ލިބޭކަމަށް އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު ވިދާޅުވެއްޖެއެވެ.
މިސްކިތު ޤާރީ ކުލާސްތައް ރާއްޖޭގެ 29 ރަށެއްގެ މިސްކިތްތަކުގައި މިހާރު ފަށާފައިވާއިރު، އެކި ޢުމުރުފުރާތަކުގެ ކުދިން އަންނަނީ ކުލާސްތަކުގައި ބައިވެރިވެ ޤުރުއާން އުނގަނަމުންނެވެ. މި ކުލާސްތަކުގައި ކިޔަވައިދެއްވަނީ މިސްކިތްތަކުގެ އިމާމުންނެވެ.
އިސްލާމީ ކަންތައްތަކާ ބެހޭ ވުޒާރާއިން ވިދާޅުވީ އިމާމުން މި ކުލާސްތަކުގައި ޤުރުއާން އުނގަންނައިދެއްވަނީ ހިލޭސާބަހަށްކަމަށާއި ދަރިވަރުންގެ އަތުން އެއްވެސް ފީއެއް ނެގުމެއްނެތިކަމަށެވެ.
މިސްކިތު ޤާރީ ކުލާސް ފެށުމުގެ ރަސްމިއްޔާތުގައި ވާހަކަފުޅު ދައްކަވަމުން ވަޒީރު ވިދާޅުވީ، މި ކުލާސް ފެއްޓެވުމަށް ނިންމެވި އެންމެ ބޮޑު އެއް ސަބަބަކީ ގިނަ ރަށްތަކުގެ ޤުރުއާން ކިޔަވައިދެއްވަން ބޭނުންވެލައްވާ އިމާމުން ތިއްބަވާކަމަށާއި އެ އިމާމުންނަށް ދިމާވާ ދައްޗަކީ ޤުރުއާން ކިޔަވައިދޭނެ ޖާގައެއް ނެތުންކަމަށެވެ. އެހެންކަމުން މި ކުލާސްތަކަކީ އެއިމާމުންނަށް ފުރުސަތެއް ފަހިވެގެންދާނެ ކުލާސްތަކަކަށްވާނެކަމަށް ވަޒީރު ވިދާޅުވިއެވެ.
ވަޒީރު އިތުރަށް ވިދާޅުވީ، ޤުރުއާނުގެ ޢިލްމު ރާއްޖޭގައި މިހިސާބަށްވެސް އައިސްފައިވަނީ އިހުޒަމާނުގައި ހިލޭ ސާބަހަށް އިމާމުންނާއި މުދިންމުންނާއި އެދުރުދައިތައިންނާއި އެދުރުބޭބެމެން ކޮށްދެއްވި ބުރަ މަސައްކަތާއި ޤުރުބާނީގެ ސަބަބުންކަމަށެވެ.
އިސްލާމީ ކަންތައްތަކާ ބެހޭ ވުޒާރާއިން އަމާޒު ހިފާފައިވަނީ ކުރިއަށް އޮތްތަނުގައި ރާއްޖޭގެ ވީހާވެސް ގިނަ ރަށްތަކެއްގައި މި ކުލާސްތައް ކުރިއަށް ގެންދިއުމަށެވެ. މިހާތަނަށް އިސްލާމީ ކަންތައްތަކާއި ބެހޭ ވުޒާރާއިން 32 ފަރާތަކަށް މިސްކިތްތަކުގައި ޤުރުއާން ކުލާސް ހިންގުމުގެ ހުއްދަ ދެއްވާފައިއެވެ. އޭގެތެރޭގައި 23 ރަށަކާއި، 3 ޖަމްޢިއްޔާއަކާއި މާލެ ސަރަހައްދުގެ 5 މިސްކިތެއް ހިމެނެއެވެ.
