ކޮވިޑް-19 ވެކްސިން ދޭމަތިން، މެޑިކަލް ސްޓާފުންނާއި، ގިނަ އަދަދަކަށް ނަރުހުން ޔޫކޭއާއި، ޖަރުނުގައި މަސައްކަތް ކުރަން ފޮނުވައިދިނުމަށް ފިލިޕީންސުން ހުށަހަޅައިފިއެވެ.
ޔޫކޭއާއި ޖަރުމަނުން ފިލިޕީންސަށް ހިލޭ ކޮވިޑް ވެކްސިން ދޭނަމަ، ނަރުހުންނާއި މެޑިކަލް ސްޓާފުން ފޮނުވައިދެވިދާނޭ ކަމަށް ފިލިޕީންސުންވަނީ ބުނެފައެވެ.
ފިލިޕީންސް ސަރުކާރުގެ ލޭބަރ މިނިސްޓްރީގެ އިންޓަރނޭޝަނަލް އެފެއަރޒް ބިއުރޯގެ ޑިރެކްޓަރ އެލިސް ވިސްޕެރާސް ވިދާޅުވީ، ފިލިޕީންސްގެ ޑޮކްޓަރުންނާއި، ނަރުހުންނާއި އެނޫންވެސް މެޑިކަލް ސްޓާފުން ބޭރު ގައުމުތަކަށް ދިއުމަށް އޮންނަ ލިމިޓަށް ލުއިދިނުމަށް ސަރުކާރު އޮތީ ތައްޔާރަށް ކަމަށެވެ.
ފިލިޕީންސްގެ ޑޮކްޓަރުންނާއި ނަރުހުން ބޭރު ގައުމުތަކަށް ވަޒީފާއަށް ދިއުން ކުރިން އޮންނަނީ މުޅިން މަނާކޮށްފައެވެ.
ނަމަވެސް، އެކަމަށް ހިސާބެއްގެ ލުއިދީ، މިހާރު އޮންނަ އުސޫލުން އަހަރެއްގެ މައްޗަށް ބޭރު ގައުމުތަކަށް ވަޒީފާއަށް ދެވެނީ 5،000 މީހުންނަށެވެ.
ބޭރު ގައުމުތަކުގައި ފިލިޕީންސްގެ އެތައް މިލިއަން މީހުން ވަޒީފާ އަދާކުރަމުން ގެންދާއިރު، އޭގެ ތެރޭގައި ނަރުހުންވެސް ހިމެނެއެވެ.
ބޭރު ގައުމުތަކުގައި ވަޒީފާ އަދާކުރާ ފިލިޕީންސްގެ ރައްޔިތުންގެ ފަރާތުން އެ ގައުމަށް އަހަރެއްގެ މައްޗަށް 30 ބިލިއަން އެމެރިކާ ޑޮލަރު ވަދެއެވެ.
ފިލިޕީންސް ސަރުކާރުގެ ލޭބަރ މިނިސްޓްރީގެ އިންޓަރނޭޝަނަލް އެފެއަރޒް ބިއުރޯގެ ޑިރެކްޓަރ އެލިސް ވިސްޕެރާސް ވިދާޅުވީ، ޔޫކޭއާއި، ޖަރުމަނުން ބަދަލުގައި ވެކްސިންދޭން އެއްބަސްވާނަމަ، މެޑިކަލް ސްޓާފުން ފޮނުވުމަށް އޮތް ހިފެހެއްޓުމަށް ލުއިދޭން ސަރުކާރުން އޮތީ ތައްޔާރަށް ކަމަށެވެ.
އެކަމަކު، ޔޫކޭގެ ހެލްތު މިނިސްޓްރީން ބުނެފައިވަނީ، އެފަދަ އެއްބަސްވުމަކަށް ދިއުމުގެ ޝައުގުވެރިކަމެއް ނެތް ކަމަށެވެ.
ޔޫކޭއިން އެންމެ ފުރަތަމަ އިސްކަންދެނީ އަމިއްލަ ގައުމުގެ ރައްޔިތުންނަށް ވެކްސިން ދިނުމަށް ކަމަށާއި، އެހެން ނަމަވެސް، މުސްތަގްބަލުގައި ޔޫކޭއިން އެހެން ގައުމުތަކަށް ވެކްސިން ދޭނޭ ކަމަށް ބުނެފައި ވެއެވެ.
އޭޝިޔާއިން އެންމެ ގިނަ މީހުންނަށް ކޮވިޑް ބަލި ޖެހިފައިވާ ގައުމުތަކުގެ ތެރޭގައި ފިލިޕީންސް ހިމެނޭއިރު، ޔޫކޭއަކީ ކޮވިޑް ބަލީގައި ދުނިޔެއިން 5 ވަނައަށް އެންމެ ގިނަމީހުން މަރުވެފައިވާ ގައުމެވެ.
ޖަރުމަނަކީ، ދުނިޔޭގެ ގައުމުތަކުގެ ތެރެއިން 10 ވަނަ އަށް ބަލީގެ ހާލަތު އެންމެ ގޯސްވެފައިވާ ގައުމެވެ.
ޔޫކޭއިން ބުނެފައިވަނީ، މިދިޔަ އަހަރު މަސައްކަތްކުރި ނަރުހުންނަށްވުރެ މިއަހަރު 11،000 އިތުރަށް ނަރުހުން އެބަތިބި ކަމަށެވެ. ޔޫކޭގައި ފިލިޕީންސްގެ 30،000 ނަރުހުން މިހާރުވެސް މަސައްކަތް ކުރަމުން ގެންދާކަން ފާހަގަކޮށް ޔޫކޭ ސަރުކާރުންވަނީ އެކަން ފާހަގަ ކޮށްފައެވެ.
އެހެން ނަމަވެސް، ބަދަލުގައި ވެކްސިން ދީގެން ނަރުހުންގެ އަދަދު އިތުރުކުރަން ބޭނުން ނުވާކަމަށް ބުނެފައި ވެއެވެ.
ފިލިޕީންސްގެ ސަރުކާރުގެ ހުށަހެޅުމަށް ޖަރުމަނުން އަދި ވަކި އެއްޗެއް ބުނެފައެއް ނުވެއެވެ.
