މާލޭގެ ކަރަންޓު ވިއުގަ އިތުރަށް ހަރުދަނާކުރުމުގެ މަސައްކަތް ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އިން ބާރު ސްޕީޑުގައި ދަނީ ކުރަމުންނެވެ.
ސްޓެލްކޯއިން ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ، ކަރަންޓުގެ ޚިދުމަތުގެ ދެމެހެއްޓެނިވިކަން އިތުރަށް ކަށަވަރުކޮށް، މާލޭގެ މަތިވަމުންދާ ޑިމާންޑާއި އެއްވަރަށް ޚިދުމަތް ފޯރުކޮށްދިނުމަށާއި ޕީކް ސީޒަނަށް ތައްޔާރުވުމުގެ ގޮތުން މި މަސައްކަތްތައް ކުރަމުންދާ ކަމަށެވެ.
މި މަސައްކަތުގެ ތެރެއިން މަޖީދީމަގާއި ސޯސަންމަގު ގުޅޭ ކަންމަތީގައި ގާއިމްކޮށްފައިވާ ސަބްސްޓޭޝަނުގެ ކެޕޭސިޓީ އިތުރުކުރުމަށް، އެތަނުގައި ބަހައްޓާފައި ހުރި 630 ކިލޯވޮޓްގެ ޓްރާންސްފޯމަރެއް ނަގައި، 1500 ކިލޯވޮޓުގެ ޓްރާންސްފޯމަރެއް މިހާރު ވަނީ ބަހައްޓާފައެވެ.
"މީގެ އިތުރުންވެސް މާލޭގެ ކަރަންޓުގެ ޑިމާންޑާއި އެއްވަރަށް ކޭޓަރ ކުރުމަށް، ޑިސްޓްރިބިއުޝަން ވިއުގައިގެ ކެޕޭސިޓީ އިތުރުކުރުމަށް ގިނަ މަސައްކަތްތަކެއް މިއަހަރުގެތެރޭ ކުރުމަށް ވަނީ ހަމަޖެހިފައި،" ސްޓެލްކޯގެ ޕޯސްޓިގައި ވިދާޅުވެފައިވެއެވެ.
މި މަސައްކަތްތަކުގެ ސަބަބުން މާލޭގެ ރައްޔިތުންނަށް ލިބޭ ކަރަންޓުގެ ޚިދުމަތް އިތުރަށް ރަނގަޅުވެ، ކަރަންޓު ކެނޑުމުގެ މައްސަލަތައް މަދުވާނެ ކަމަށް ބެލެވެއެވެ.
