ދެކުނު ކޮރެއާގެ ރައީސް ޔޫން ސުކް ޔެއޯލް ވަނީ މި ރޭ ކުއްލި ހާލަތު އިއުލާން ކުރައްވާފައެވެ. އޭނާ ވިދާޅުވީ "ދައުލަތާ ދެކޮޅަށް މަސައްކަތް ކުރާ ބާރުތައް ނައްތާލަން ޖެހޭނެ" ކަމަށެވެ. ދެކުނު ކޮރެއާގައި ހުރިހައި ސިޔާސީ ހަރަކާތެއް ވަނީ މަނާ ކޮށްފައެވެ.
ރައީސްގެ މިއިއުލާނުން މުޅި ގައުމު ސިއްސުވާލައިފިއެވެ.
ކުއްލި ހާލަތު އިއުލާން ކުރުމާއެކު މާޝައްލޯވެސް އިއުލާން ކޮށްފައި ވެއެވެ. ގާނޫނުއަސާސީ ސަސްޕެންޑް ކޮށް ސިފައިންގެ ބާރު ހިނގާނެ ކަން އިއުލާންކޮށް އިސް މާޝައްލޯ އޮފިސަރެއްގެ ގޮތުގައި ހަމަޖައްސާފައި ވަނީ ސިފައިންގެ ޗީފް އޮފް ސްޓާފެވެ.
މިރޭ ދެކުނު ކޮރެއާ ގަޑިން 10:24 ހާއިރު ދެއްވި ފަސް މިނެޓުގެ ލައިވް ތަގްރީރެއް ދެއްވި އިރު އެއްވެސް ނޫސްވެރިއަކު އެތާގައި ނެތެވެ.
ވެރިކަން ކުރާ ޕާޓީންވެސް ވަނީ ކުއްލި ހާލަތު އިއުލާން ކުރުން ގޯސްކަމަށް ބުނެފައެވެ.
ޕާލަމެންޓުންނާއި އިދިކޮޅު ފަރާތްތަކުންނާއި އަމިއްލަ ޖަމުއިއްޔާ ޖަމާއަތްތަކުން ވަނީ ކުއްލި ހާލަތު އުވާލުމަށް ރައީސަށް ގޮވާލާފައެވެ.
އެގައުމުގެ ގާނޫނުއަސާސީ ބުނާ ގޮތުން ޕާލަމެންޓްގެ މެޖޯރިޓީ އެދިއްޖެ ހާލަތެއްގައި ކުއްލި ހާލަތު އުވާލަން ޖެހެއެވެ. ޕާލަމެންޓްގައި ގިނައީ އިދިކޮޅު މީހުންނެވެ. ރައީސް ވިދާޅުވީ އުތުރު ކޮރެއާއިން ދިމާވާ ނުރައްކަލާއި އެތެރޭގައި ދައުލަތާ ދެކޮޅަށް މަސައްކަތް ކުރާ މީހުންގެ ނުރައްކާ އިތުރު ވެފައިވާ ކަމަށާއި އެ ފަރާތްތައް ސާފު ކުރަން ޖެހޭ ކަމަށެވެ.
2022ގައި އޭނާ ވެރިކަމަށް ވަޑައިގަތް ފަހުން މިހާތަނަށް އޭނާގެ 22 މަސްއޫލުވެރިން އިމްޕީޗް ކުރުމަށް ޕާލަމެންޓުން މަސައްކަތް ކޮށްފައި ވެއެވެ.
އިދިކޮޅު ޕާޓިން ވަނީ ޕާލަމެންޓަށް މެމްބަރުން އައުމަށް އިއުލާން ކޮށްފައެވެ. ނަމަވެސް ސިފައިން ވަނީ ޕާލަމެންޓަށް ވަދެ އެތަން ސިފައިންގެ ބާރުގެ ދަށަށް ގެނަސްފައެވެ. ފޮޓޯގައި
މީޑިއާ ވަނީ ކޮންޓްރޯލު ކޮށް ޚަބަރު ސެންސަރު ކުރުމަށް ނިންމައި އައު މީޑިއާ ސެންސަރުކުރާ އޮފީހެއް އުފައްދާފައެވެ. މުޒާހަރާތަކާއި ސިޔާސީ އެއްވުންތަކާއި ހަމަނުޖެހުން އުފެއްދުން މަނާކޮށްފައިވާ ކަމަށް ޗީފް މާޝައްލޯ އޮފިސަރު ވަނީ އިއުލާން ކުރައްވާފައެވެ.
