ލިވަޕޫލަށް ކުޅެމުން އަންނަ މިސްރުގެ ތަރި މުހައްމަދު ސަލާހް ގެނައުމުގެ ވިސްނުން ނުގެންގުޅޭކަމަށް ޕީއެސްޖީގެ ވެރިޔާ ނައްސެރް އަލް ޚަލައިފީ ވިދާޅުވެއްޖެއެވެ.
ލިވަޕޫލުން ސަލާހަށް އާ ކޮންޓްރެކްޓެއް ހުށަހަޅާފައި ނުވާއިރު، މިސީޒަނުގައިވެސް ލިވަޕޫލުން ދައްކަމުން އަންނަ މޮޅު ކުޅުމުގައި އެންމެ ވިދުން ގަދައީ ސަލާހުއެވެ. ސަލާހު، ޕީއެސްޖީއަށް ބަދަލުވާން އުޅޭ ކަމަށް މީޑިޔާގައި ވަރަށް ބޮޑަށް ވާހަކަ ދެކެވެމުން އަންނައިރު، ޚަލައިފީ ވިދާޅުވީ އެކްލަބުން ފާރަލަމުން ދަނީ ޒުވާން ކުޅުންތެރިންނަށް ކަމަށެވެ.
"ޕީއެސްޖީ އާއި ސަލާހް ގުޅުވައި ދެކެވެނީ ކަނޑައެޅިގެން ދޮގު ވާހަކަތަކެއް. ސަލާހަކީ ކޮންމެ ކްލަބަކުންވެސް ބޭނުންވާނެފަދަ މޮޅު ކުޅުންތެރިއެއް. އެއީ ދެބަސްވެވޭނެ ކަމެއް ނޫން. އެކަމަކު ޕީއެސްޖީއިން މިވަގުތު ބޭނުން ވަނީ ޒުވާން ކުޅުންތެރިން" ޚަލައިފީ ވިދާޅުވިއެވެ.
މީޑިޔާ ބައެއް ރިޕޯޓުތައް ބުނާ ގޮތުގައި އިޓަލީގެ ޔުވެންޓަސްއިން ސަލާހަށް ވަރަށް ބޮޑަށް ޝައުގުވެރިވެއެވެ.
