މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް) ގެ ސެންޓްރަލް އޭރިއާ ކޮމާންޑުން ލ. ކަލައިދޫގައި ފަޔަރ އެވެއަރނަސް ސެޝަނަކާއި ބޭސިކް ފަސްޓް އެއިޑް ސެޝަނެއް މިއަދު ކުރިއަށް ގެންގޮސްފިއެވެ.
ކަލައިދޫ ކައުންސިލާއި ވިމެންސް ޑިވެލޮޕްމަންޓް ކޮމިޓީއާ ގުޅިގެން ބޭއްވުނު މި ސެޝަންތަކުގައި ރަށުގެ އާާންމު ރައްޔިތުންނާއި ސަރުކާރު އިދާރާތަކުން ޖުމްލަ 50 ފަރާތަކުން ބައިވެރިވިއެވެ. ފަޔަރ އެވެއަރނަސް ސެޝަނުގައި އަލިފާނުގެ މާނައާއި، އަލިފާން ރޯވާ ސަބަބުތަކާއި، އަލިފާނުގެ ބާވަތްތަކާއި، އަލިފާން ނިއްވުމުގެ އުކުޅުތަކާއި، ގޭސް ލީކުވުމުން ޢަމަލުކުރަންވީ ގޮތްތަކާއި، އަލިފާން ނިއްވާ ސާމާނު ބޭނުންކުރާނެ ގޮތްތައް ކިޔައިދެވުނެވެ. އަދި ބައިވެރިން ފަޔަރ ބްލޭންކެޓް ބޭނުންކުރާ ގޮތް ޢަމަލީގޮތުން ދަސްކުރިއެވެ.
ބޭސިކް ފަސްޓް އެއިޑް ސެޝަނުގައި ސީޕީއާރު، ބަރން، ޗޯކިންގ، ފްރެކްޗަރ، ބްލީޑިންގ އަދި ބެންޑޭޖިންގ ފަދަ މުހިންމު ބައިތަކުގެ މަޢުލޫމާތު ދެވުނެވެ.
މި ސެޝަންތަކުގައި މަޢުލޫމާތު ދިނީ އެމްއެންޑީއެފް ސެންޓްރަލް އޭރިއާ ކޮމާންޑުގެ ތަޖުރިބާކާރު އަދި ތަމްރީނު ލިބިފައިވާ ސިފައިންނެވެ.
އެމްއެންޑީއެފްގެ ފަރާތުން މިފަދަ ސެޝަންތައް ބޭއްވުމުގެ މަޤްޞަދަކީ ރައްޔިތުންގެ މެދުގައި ހޭލުންތެރިކަން އިތުރުކޮށް، ކުއްލި ހާލަތްތަކުގައި އަމަލުކުރާނެ ގޮތްތައް ދަސްކޮށްދިނުމެވެ. މިފަދަ ސެޝަންތަކުން ރަށްރަށުގެ ރައްކާތެރިކަމާއި ސަލާމަތްތެރިކަން އިތުރުވެގެންދާނެ ކަމަށް ބެލެވެއެވެ.
