ރާއްޖެއަށް މުދާ އެތެރެކޮށް މާލޭ ވިޔަފާރި ބަނދަރުގައި ނުގެންގޮސް ގިނަ ދުވަހު ބެހެއްޓިފައިވާ މުދާތައް ނީލަމަށް ވިއްކާލަން ހަމަޖެހިފައިވާ ކަމަށް މޯލްޑިވްސް ޕޯޓްސް ލިމިޓެޑް (އެމްޕީއެލް) އިން އިއުލާނުކޮށްފިއެވެ.
ނީލަމަށް ވިއްކުމަށް ހަމަޖެހިފައިވާ މުދާ ބެލުން 31 އޮކްޓޫބަރު ވާ ބުރާސްފަތި ދުވަހުގެ 16:30 ގައެވެ. މުދާ ބެލުމަށް ނަން ނޯޓް ކުރުމުގެ ސުންގަޑިއަކީ 2024 އޮކްޓޫބަރު 31 ވާ ބުރާސްފަތި ވަނަ ދުވަހުގެ 15:30 އެވެ.
މި މުދާތަކަށް ނީލަން ކިޔުން އޮތީ 4 ނޮވެންބަރު 2024 ވާ ހޯމަ ދުވަހުގެ 14:00 އިން 5 ނޮވެންބަރު ވާ އަންގާރަ ވަނަ ދުވަހުގެ 14:00 އަށެވެ.
ނީލަމަށް އަގު ހުށަހެޅުން ބަންދުކުރަން ހަމަޖެހިފައިވަނީ, ނީލަމަށް އެންމެ ފަހުން ހުށަހަޅާ އަގު ހުށަހަޅާތާ 5 މިނެޓުގެ ވަގުތެއް ދިނުމަށް ފަހުއެވެ. އެ 5 މިނެޓުގެ ތެރޭގައި އިތުރު އަގެއް ހުށައަޅައިފިނަމަ އަލުން 5 މިނެޓު ގުނަން ފެށޭނެއެވެ. ނީލަން ކިޔުން ބަންދުވާނީ އަގެއް ހުށަނާޅާ އޮވެ 5 މިނެޓް ހަމަވުމުންނެވެ.
މި ނީލަމުގައި ނުވިކޭ މުދާތައް ދެވަނަ ފަހަރަށް ނީލަމަށް ކިޔާނެ ކަމަށް އެމްޕީއެލްއިން ވަނީ ހާމަކޮށްފައެވެ.
