ގާނޫނު އިސްލާހު ކޮށްގެން ވިޔަސް ޝަންގްރީލާ ވިލިނގިލި ރިސޯޓު އަލުން ހުޅުވާނަން ކަމަށް ޓުއަރިޒަމް މިނިސްޓަރު އިބްރާހީމް ފައިސަލް ވިދާޅުވެއްޖެއެވެ.
ފައިސަލް މިހެން ވިދާޅުވީ މިއަދު ރައްޔިތުންގެ މަޖިލީހުގައި ހިތަދޫ ދެކުނު ދާއިރާގެ މެންބަރު, އިބްރާހީމް ނާޒިލް ކުރެއްވި ސުވާލަކަށް ޖަވާބު ދެއްވަމުންނެވެ.
2020 ވަނަ އަހަރު ބަންދުކުރި ޝަންގްރީލާ ރިސޯޓާ ބެހޭ ގޮތުން ނާޒިލް ކުރެއްވި ސުވާލަށް ޖަވާބު ދެއްވަމުން ފައިސަލް ވިދާޅުވީ ގާނޫނު އިސްލާހުކުރަން ޖެހޭނަމަ އެކަން ކޮށްގެންވިއަސް އެ ރިސޯޓު ހުޅުވާނެ ކަމަށެވެ.
"އަޅުގަނޑުމެންގެ ސަރުކާރުން ޝަންގްރީލާ ރިސޯޓު ހުޅުވުމުގެ މަސައްކަތް ކުރަމުން އަންނަތާ އެތައް އަހަރެއް ވެއްޖެ. މި މަސައްކަތަކީ ހަމައެކަނި ފާއިތުވެދިޔަ 10 މަހު ކުރެވެމުން އައި މަސައްކަތެއް ނޫން. ރައީސް ޑރ. މުހައްމަދު މުއިއްޒު ވަނީ ވައުދުވެވަޑައިގަންފަ އެ ރިސޯޓު ވީހާ ވެސް އަވަހަށް ހުޅުވާނެ ކަމަށް. ޓުއަރިޒަމް މިނިސްޓްރީއިން އަންނަނީ އެ މަސައްކަތް ކުރަމުން" ޝަންގްރީލާ ރިސޯޓާ ބެހޭ ގޮތުން ވާހަކަފުޅު ދައްކަވަމުން ފައިސަލް ވިދާޅުވިއެވެ.
2020 ވަނަ އަހަރުގެ ކޮވިޑްގެ ބަލިމަޑުކަމުގެ ދުވަސްވަރު ޝަންގްރީލާ ރިސޯޓު ބަންދުކުރެވިފައިވާއިރު, މި ދިޔަ ސަރުކާރުން ވަނީ އެ ރިސޯޓު ހިންގަމުންއައި "އައްޑޫ ސިޓީ އިންވެސްޓްމެންޓްސް ޕްރައިވެޓް ލިމިޓެޑް" ކުންފުނީގައި ސަރުކާރުގެ އޮތް 30 އިންސައްތައިގެ ހިއްސާ ދޫކޮށްލައިފައެވެ. އޭގެ ފަހުން އެ ރިސޯޓު އަލުން ހުޅުވުމަށް ޓަކައި ރަސްމީ ގޮތުން މަސައްކަތެއް ކުރެވިފައެއް ނުވެއެވެ.
