ޑެޕިއުޓީ ކޮމިޝަނަރ އޮފް ޕޮލިސް އިސްމާޢީލް ނަވީން، މޯލްޑިވްސް މަނިޓަރީ އޮތޯރިޓީގެ ފައިނޭންޝަލް އިންޓެލިޖެންސް ޔުނިޓުގެ އިސްވެރިންނާ ބައްދަލުކުރައްވައިފިއެވެ.
މި ބައްދަލުވުމުގައި، އެމްއެމްއޭގެފައިނޭންޝަލް އިންޓެލިޖެންސް ޔުނިޓުގެ ހެޑް، ޢަބްދުﷲ އަޝްރަފް އަދި ޑެޕިއުޓީ ހެޑް މުހައްމަދު އިޝްރާޤް ފައިސަލް ބައިވެރިވެވަޑައިގެންނެވިއެވެ.
ފުލުހުން ބުނީ ޝަހީދު ހުސައިން އާދަމް ބިލްޑިންގގައި އިއްޔެ ބޭއްވި މި ބައްދަލުވުމަކީ މަނީ ލޯންޑަރިންގ އަދި ޓެރަރިޒަމަށް ފައިނޭންސްކުރުން ހުއްޓުވުމުގެ ގާނޫނު ތަންފީޒުކުރެވެމުންދާ މިންވަރާ ގުޅޭގޮތުން މިއުޗުއަލް އިވެލުއޭޝަނަށް ބޭނުންވާ މައުލޫމާތު ހިއްސާކުރުމަށް ބޭއްވި ބައްދަލުވުމެއް ކަމަށެވެ.
މި ބައްދަލުވުމުގައި، ދިވެހި ފުލުހުންގެ ޚިދުމަތުން ތަފާސްހިސާބު ބެލެހެއްޓުމާއި ހިއްސާކުރުމާއި، ފައިނޭންޝަލް އެނަލިސްޓުންނަށް ބޭނުންވާ ތަމްރީނު ޕްރޮގްރާމްތައް ހިންގައި، މުވައްޒަފުންގެ ގާބިލުކަން އިތުރުކުރުމާ އަދި ދެ އިދާރާ ގުޅިގެން މަސައްކަތްކުރުމާ ގުޅޭގޮތުން މަޝްވަރާކުރެއްވިއެވެ.
މީގެ އިތުރުން، ގައުމީ އަދި ބައިނަލްއަގުވާމީ ފެންވަރުގައި ހަދާ އެސެސްމަންޓުތަކަށް މައުލޫމާތު ބަދަލުކުރުމުގައި ކުރަންޖެހޭ ކަންކަން ހަރުދަނާކުރުމަށް ގުޅިގެން ކުރެވިދާނެ ކަންކަމާ ގުޅޭގޮތުން ވެސް މި ބައްދަލުވުމުގައި މަޝްވަރާކުރެއްވިއެވެ.
