އުމުރުން ދުވަސްވީ އަންހެނެއްގެ ކޭޝް ކާޑެއް ވަގަށް ނަގައި އެ ކާޑުން ގިނަ އަދަދެއްގެ ފައިސާ ނެގި ދެ މީހަކު ހައްޔަރުކޮށްފިކަމަށް ފުލުހުން ބުނެފިއެވެ.
ފުލުހުން މިހެން ބުނެފައިވަނީ މިއަދު މީޑިއާތަކަށް ފޮނުވި މެސެޖެއްގައެވެ.
އެ މެސެޖުގައި ފުލުހުން އިތުރަށް ބުނެފައިވަނީ . ގއ. ވިލިނގިލީ އުމުރުން ދުވަސްވީ އަންހެނެއްގެ ކޭޝް ކާޑެ ބޭނުންކޮށްގެން ގއ. މާމެންދޫ ބީއެމްއެލް ބްރާންޗުގެ އޭޓީއެމުން ފައިސާތަކެއް ނެގި މައްސަލައެއް ރޭ 08:13 ކަންހާއިރު ރިޕޯޓްކުރި ކަމަށެވެ.
އަދި އެ ރިޕޯޓާގުޅިގެން ހިންގިއޮޕަރޭޝަނުގައި ފައިސާ ނެގިކަމަށް ތުހުމަތުކުރެވޭ މީހުން އަތުލައިގަނެފައިވާ ކަމަށް ފުލުހުން ބުނެފައި ވެއެވެ. އަދި އެ މީހުން ހައްޔަރުކުރީ މާމެންދޫއިން ވިލިނގިއްޔަށް ދަތުރުކުރަމުންދަނިކޮށް ކަނޑުމަތިން ކަމަށާއި އެ މީހުން ވަގަށް ނެގި ކާޑުން ނެގި ކަމަށް ބެލެވޭ 25،000 ރުފިޔާގެ ތެރެއިން 23،000 ރުފިޔާ ފެނިފައިވާ ކަމަށް ވެސް ފުލުހުން ބުންޏެވެ.
ފުލުހުން ވަނީ މި މައްސަލައިގައި ހައްޔަރުކުރި މީހުންގެ ވަނަވަރު ފޮޓޯއާއެކު އާންމުކޮށްފައެވެ. އެ ދެ މީހުންނަނީ ގއ. ވިލިނގިލި، ލައިފް، މުހައްމަދު ޝާއިމް ޝަމީޒް، 22އ، އަދި ލ. ގަން، ތުނޑި، ނޯތު ހެވަން، ހަމްދޫން ހަލީލް، 24އ އެވެ.
ފުލުހުން ދަނީ މި މައްސަލަ އިތުރަށް ތަހުގީގުކުރަމުންނެވެ.
