މާދަމާ (25 އޮކްޓޯބަރު ) އާރްޓީއެލް ބަހުގެ ބައެއް ޚިދުމަތްތައް މެދުކެނޑޭނެކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ހާމަކުރައްވައިފިއެވެ.
މި މެދުކެނޑުން އަންނަނީ "ދިރާގު ރޯޑު ރޭސް 2024" ގެ ހަރަކާތްތައް ކުރިއަށް ގެންދިއުމަށްޓަކައި ހުޅުމާލޭގެ ބައެއް މަގުތައް ބަންދުކުރުމާ ގުޅިގެންނެވެ. އެމްޓީސީސީ އިން ހާމަކުރި ގޮތުގައި، އާރްޓީއެލް ބަހުގެ ޚިދުމަތުގައި ހިމެނޭ R5 ގެ ދަތުރުތައް މި ދުވަހަށް މެދުކަނޑާލެވޭނެއެވެ.
މީގެ އިތުރުން، ހެނދުނު 5:00 އިން ފެށިގެން ރޭގަނޑު 19:00 ގެ ނިޔަލަށް އެމްއޭސީއެލްގެ ޑްރޮޕްއޮފް ސްޓޮޕް އަދި ސީއެޗްއެސްއީ ސްޓޮޕް އަށް ވެސް ޚިދުމަތް މެދުކަނޑާލެވޭނެ ކަމަށް އެމްޓީސީސީ އިން ވަނީ އަންގާފައެވެ.
މި ބަދަލުތަކުގެ ސަބަބުން ކަސްޓަމަރުންނަށް ދިމާވެދާނެ އެންމެހާ ދަތިތަކަށް އެމްޓީސީސީ އިން ވަނީ މާފަށް އެދިފައެވެ. އަދި އިތުރު މަޢުލޫމާތު ހޯދުމަށް ބޭނުންވާ ފަރާތްތަކަށް އެމްޓީސީސީގެ ހޮޓްލައިން ނަންބަރު 1650 އަށް ގުޅުމަށް އެ ކުންފުނިން ވަނީ އިރުޝާދު ދީފައެވެ.
