ގައުމީ ވޮލީބޯޅަ މުބާރާތުގެ އަންހެން ޑިވިޜަންގެ ފައިނަލުގައި ވާދަވެރި ޕޮލިސް ކުލަބު 1-3 ސެޓުން ބަލިކޮށް، ކުލަބު ވެމްކޯއިން މުބާރާތުގެ ތަށި ރޭ މިލްކުކޮށްފިއެވެ.
ޒުވާނުންގެ މަރުކަޒުގެ އެތެރޭ ކޯޓުގައި ކުޅުނު ފޯރިގަދަ މިމެޗުގައި ފުރަތަމަ ދެ ސެޓް ގެންދިޔައީ ވެމްކޯއިންނެވެ. އެއީ 25-23 އަދި 25-23 އިންނެވެ. އެކަމަކު ޕޮލިސް ކުލަބުން ވަނީ ވަރުގަދަ ހިތްވަރެއްކޮށް ތިންވަނަ ސެޓު 25-12 އިން ގެންގޮސްފައެވެ. އެކަމަކު ހަތަރުވަނަ ސެޓުގައި ޕޮލިހަށް މާބޮޑު ވާދައެއް ނުކުރެވުނެވެ. މި ސެޓު ވެމްކޯއިން 25-16 އިން ކާމިޔާބުކޮށް، މުބާރާތުގެ ތަށި މިލްކު ކުރީއެވެ.
މި މުބާރާތުގެ އެންމެ މޮޅު ތިން ކުޅުންތެރިންނަށް ހޮވުނީ ވެމްކޯގެ ކެޕްޓަން އައިޝަތު މާޖިދާ އާއި، ފާތިމަތު ޖޫޒާން ޒަރީރުގެ އިތުރުން ޕޮލިސް ކުލަބުގެ ކެޕްޓަން ހައްވާ ރާޝިދާއެވެ. އަދި 19 އަހަރުން ދަށުގެ އެންމެ މޮޅު ކުޅުންތެރިއަކަށް ހޮވުނީ ވޮލީބޯލް ޔޫތު ނިއު ޖެނެރޭޝަނުގެ އައިޝަތު ނަސްމާ އަޙްމަދެވެ.
މުބާރާތުގެ އެންމެ މޮޅު ކޯޗުގެ މަގާމު ހޯދީ ވެމްކޯގެ ކޯޗު އަޙްމަދު އަދީލެވެ.
ގައުމީ ވޮލީބޯޅަ މުބާރާތުގެ ތަށި ވެމްކޯއިން މިލްކުކުރިއިރު، އެ ޓީމުން މިދިޔަ އަހަރުގެ ޑިސެމްބަރު ބޭއްވި ވޮލީބޯލް އެސޯސިއޭޝަން ކަޕުގެ އަންހެން ޑިވިޝަނުގެ ތަށިވެސް މިލްކުކޮށްފިއެވެ.
ވޮލީގެ އިތުރުން ވެމްކޯއަކީ ރާއްޖޭގެ ފުޓްސަލްގައިވެސް ވަރުގަދަ ބާރެކެވެ. ވެމްކޯއިން ވަނީ މިދިޔަ ހަފްތާގައި ކްލަބް މޯލްޑިވްސް ކަޕުގެ ފައިނަލުގައި އާރުއާރުސީ 4-1 އިން ބަލިކޮށް، ޖެހިޖެހިގެން ދެވަނަ ފަހަރަށް ޗެމްޕިއަންކަން ހޯދައި މުބާރާތުގެ ތަށި މިލްކު ކުރުމުގެ ފުރުސަތު ހޯދާފައެވެ.
