ސަހްޔޫނީ އިޒްރޭލުން ޣައްޒާގެ އުތުރަށް ޓެންކަރުތަކާއެކު އަރައިގަނެ ބޮޑު ޤަތުލްއާންމެއް ހިންގަމުންދާ ކަމަށް ވަރލްޑް ހެލްތު އޮގަނައިޒޭޝަން (ޑަބްލިއުއެޗްއޯ) އިން ބުނެފިއެވެ.
ޑަބްލިއުއެޗްއޯއިން ބުނެފައި ވަނީ އުތުރު ޣައްޒާގައި އެންމެފަހުން އޮޕަރޭޓް ކުރަމުންދިޔަ އަލް އަވްދާ ހޮސްޕިޓަލުގައި މަސައްކަތް ކުރަމުންދިޔަ އެ ޖަމާއަތުގެ ސިއްހީ މަސައްކަތެރިންނާ މުވާސަލަތީ ގުޅުން ކެނޑިފައިވާ ކަމަށެވެ. ސަޔްހޫނީ ފައުޖުން މީގެ ކުރިން ގަސްދުގައި ޑަބްލިއުއެޗްއޯ މަސައްކަތްތެރިންނަށް ހަމަލާދީ މަރާލާފައިވާތީ، މުއާސަލާތީ ގުޅުން ކެނޑިފައިވާ މަސައްކަތްތެރިން ދިރިހުރިކަމާމެދު ވަނީ ސުވާލު އުފެދިފައެވެ.
އަލްޖަޒީރާއިން ބުނެފައިވާ ގޮތުގައި އުތުރު ޣައްޒާގައި އިޒްރޭލުން ހިންގި ބޮޑު ޤަތުލް އާންމުގައި 150 އަށްވުރެ ގިނަ މީހުން ވަނީ ޝަހީދު ކޮށްލާފައެވެ. އަދި އިމާރާތްތައް ވަނީ ބިމާ ހަމަކޮށްފައެވެ.
ސަހްޔޫނީ އިޒްރޭލު ސިފައިން އުތުރު ޣައްޒާގެ އެންމެ ބޮޑު 3 ހޮސްޕިޓަލު ސުންނާފަތި ކޮށްލާފައިވާއިރު، ޒަޚަމްވާ އެއްވެސް މީހަކަށް ފަރުވާދެވޭނެ ގޮތެއް އުތުރު ޣައްޒާގައި ނެތެވެ.
ހޮސްޕިޓަލްތައް ސުންނާފަތި ކުރަމުންދާ ސަޔްހޫނީ އިޒްރޭލުން ބުނެފައި ވަނީ ހޮސްޕިޓަލުތަކަށް ހަމަލާ ދެމުން ދަނީ އިންޓަލެޖެންސް މައުލޫމާތަށް ބެލުމަށްފަހު ކަމަށެވެ. ހޮސްޕިޓަލުތައް ސުންނާފަތި ކުރުމަށްފަހު ސަޔްހޫނީ އިޒްރޭލުން ބުނަމުން ދަނީ އެތަންތަން ބޭނުން ކުރަމުންދަނީ ހަމާސް ޖަމާއަތުން ކަމަށެވެ.
