ތެހެރާން – އިސްރާއީލުން ކުރިމަތިވެދާނެ ކޮންމެ ހަމަލާއަކަށް އަވަސް ރައްދު ދިނުމަށް އީރާނުގެ ހަތިޔާރު އެޅި ސިފައިން 1،000 މިސައިލް ތައްޔާރީ ހަލާތަށް ގެނެސްފައިވާ ކަމަށް އެމެރިކާގެ ނިއުޔޯކް ޓައިމްސްއިން ބުނެފި އެވެ.
ސަހްޔޫނީ އިސްރާއީލުން ރާއްޖޭ ގަޑިން ރޭ ފަތިހުގެ ވަގުތެއްގައި އިރާނަށް ވައިގެ މަގުން ހަމަލާ ދީފައިވާއިރު، އިރާނުން ރައްދު ދޭނެ ގޮތަކާމެދު އަސްކަރީ ތަޖުރިބާކާރުން ގެންދަނީ ތަފާތު ގޮތްގޮތަށް ހިޔާލު ފާޅުކުރައްވަމުންނެވެ.
އެމެރިކާގެ ނޫހުން ބުރާސްފަތި ދުވަހު ޝާއިއުކުރި ރިޕޯޓެއްގައި ބުނެފައި ވަނީ ތެހެރާނުން ހަނގުރާމައެއް ކުރަން ބޭނުން ނުވާކަމަށާއި އެކަމަކު، ހަނގުރާމައެއް ކުރަން ޖެހިއްޖެނަމަ އެކަމަށް ތައްޔާރަށް އޮތް ކަމަށެވެ.
ނިއުޔޯކް ޓައިމްސް ބުނީ އިސްރާއީލުގެ ކޮންމެ ހަމަލާއަކަށް ހަލުވިކަމާއެކު ރައްދު ދިނުމަށް އީރާނުގެ ހަތިޔާރު އެޅި ސިފައިންނަށް އެތައް އަސްކަރީ ޕްލޭންތަކެއް އެކުލަވާލުމަށް އިސްލާމީ އިންގިލާބުގެ ލީޑަރު އާޔަތުالله ސައްޔިދު އަލީ ޚާމަނާއީ އަންގަވާފައިވާ ކަމަށެވެ. މި ރިޕޯޓަކީ އިސްރާއީލުން ލިބިދާނެ ހަމަލާއަކަށް ރައްދު ދިނުމަށް އީރާނުން "10 މަންޒަރެއް" ތައްޔާރުކޮށްފައިވާ ކަމަށް ބުނެފައިވާ އީރާނުގެ ތަސްނީމް ނިއުސް އެޖެންސީން ކުރިން ރިޕޯޓްކުރި ރިޕޯޓާ އެއްގޮތް ރިޕޯޓެކެވެ.
"ބަލާފައިވާ ޖަވާބުތަކުގެ ތެރޭގައި ހިމެނެނީ 1،000 އާއި ހަމައަށް ބެލިސްޓިކް މިސައިލްގެ ބެރެޖް؛ އެ ސަރަހައްދުގައި އީރާނުގެ ޕްރޮކްސީ ހަނގުރާމަވެރި ޖަމާއަތްތަކުން ދޭ ހަމަލާތައް ވަރުގަދަވުން؛ އަދި ދުނިޔޭގެ ހަކަތަ ފޯރުކޮށްދިނުމާއި ޕާޝިއަން ގަލްފާއި ސްޓްރޭޓް އޮފް ހޮރްމޫޒް ތެރެއިން ދަތުރުކުރާ ބޯޓުފަހަރުގެ ދަތުރުފަތުރަށް ހުރަސްއެޅުން،" ނިއުޔޯކް ޓައިމްސް ރިޕޯޓުގައި އިތުރަށް ބުނެފައިވެ އެވެ.
އިރާނުން ވަނީ އޮކްޓޯބަރު މަހުގެ އެއްވަނަ ދުވަހު ހިފާފައިވާ ސަރަހައްދުތަކުގައި ހުރި އިސްރާއީލުގެ އަސްކަރީ އަދި ޖާސޫސީ މަރުކަޒުތަކަށް ގާތްގަނޑަކަށް 200 ބެލިސްޓިކް މިސައިލުން ހަމަލާދީފައެވެ.
ރިޕޯޓްތައް ބުނާ ގޮތުގައި އީރާނުގެ %90 ޕްރޮޖެކްޓައިލްތައް އެމީހުންގެ އަމާޒުތަކަށް ޖެހުނެވެ. މި ހަމަލާތަކަށް ފަހު އިސްރާއީލުގެ ވެރިކަމުން ވަނީ ހަރުކަށި ސެންސަރުތަކެއް އަޅައި، އީރާނުގެ އޮޕަރޭޝަންގެ ހަގީގީ މިންވަރު ރިޕޯޓް ކުރަން އުޅުނު ބައެއް ނޫސްވެރިން ހައްޔަރުކޮށްފަ އެވެ.
