މަޝްހޫރު ރެއާލް މެޑްރިޑާއި ބާސެލޯނާ މިސީޒަނުގައި ބައްދަލު ކުރާ ފުރަތަމަ "އެލް ކްލެސިކޯ" މެޗް ރެއާލްގެ ސެންތިއާގޯ ބެރްނަބާއޫ ސްޓޭޑިއަމްގައި މިރޭ ކުޅެން ދެ ކްލަބުންވެސް ފުރިހަމަ ތައްޔާރީތަކެއް ވެއްޖެއެވެ.
258 ވަނަ އެލް ކްލެސިކޯއަށް ނިކުންނައިރު ރެއާލް އާއި ބާސާވެސް އޮތީ ވަރަށް ވަރުގަދަ ފޯމެއްގައެވެ.
މިރޭ ބާސެލޯނާ އަތުން ރެއާލް މޮޅުވެއްޖެނަމަ ޕޮއިންޓުގެ ގޮތުން ބާސާ އާއި ރެއާލް އެއްވަރުވާނެއެވެ. ތާވަލުގެ އެއްވަނައިގައި ބާސާ އޮތީ 27 ޕޮއިންޓް ހޯދައިގެންނެވެ.
އެލް ކްލެސިކޯގެ ތާރިހަށް ބަލާއިރު، ރެއާލްއިން ވަނީ 105 މެޗް ކާމިޔާބު ކޮށްފައެވެ. ބާސާއިން 100 މެޗް ކާމިޔާބު ކޮށްފައިވެއެވެ. 52 މެޗް ނިމުނީ އެއްވަރުވެގެންނެވެ.
އެލް ކްލެސިކޯގެ މޮޅުވުމުގެ ތިލަފަތް ރެއާލް ކޮޅަށް ބުރަވީ ފާއިތުވެދިޔަ ހަތަރު އަހަރު ތެރޭގައެވެ. އެއީ 2021 ވަނަ އަހަރުގެ އޯގަސްޓް މަހުގެ 5 ވަނަ ދުވަހު ބާސާ ދޫކޮށް ލިއޮނަލް މެސީ ދާން ޖެހުނު ހިސާބުންނެވެ.
ކޯޗް ކާލޯ އެންޗެލޮއްޓީ އާއި ތަޖުރިބާކާރު ކުޅުންތެރިން ކަމުގައިވާ ވިނީޝިއަސް ޖޫނިއަރ، ކިލިއަން އެމްބައްޕޭ އަދި ޖޫޑް ބެލިންގހަމްއާއެކު ރެއާލް އޮތީ މިރޭގެ އެލް ކްލެސިކޯއަށް ވަރަށް އިތުބާރާއެކުއެވެ.
ޖަރުމަނުގެ ކޯޗް ހަންސީ ފްލިކުގެ އިރުޝާދުގެ ދަށުން ބާސާގެ ޒުވާން ކުޅުންތެރިން ކަމުގައިވާ ލަމީން ޔަމާލް އާއި، ކަސާޑޯ، ޕެޑްރީ، އެލަހަންދްރޯ ބަލްޑޭ އަދި މިސީޒަނުގައި ތަފާތު ރަނގަޅު ފޯމެއްގައި ވިންގަރ ރަފީނާ ދައްކަމުން އަންނަ ކުޅުމުގެ ސަބަބުން ރެއާލްގެ ދަނޑުގައި ބާސާ މިރޭ މޮޅުވާނެ ކަމަށް އުއްމީދުކުރާ އެކްލަބުގެ ސަޕޯޓަރުންވެސް މަދެއް ނޫނެވެ.
މިރޭގެ އެލް ކްލެސިކޯ ފަށާނީ ރާއްޖޭ ގަޑިން ދަންވަރު 12 ޖަހާއިރުއެވެ.
