ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) ގެ 552 މުވައްޒަފުން ލީޑަރޝިޕް އެންހޭންސްމަންޓް ޕްރޮގްރާމް ފުރިހަމަ ކޮށްފިއެވެ.
މި ޕްރޮގްރާމަކީ ކުންފުނީގެ ކޮންމެ މުވައްޒަފަކަށްވެސް ވަރަށް މުހިންމު ޕްރޮގްރާމެއްކަމަށް ސްޓެލްކޯގެ މެނޭޖިންގ ޑިރެކްޓަރ ޙުސައިން ފަހުމީ ވިދާޅުވެފައިވެއެވެ.
ސޯޝަލް މީޑިއާގައި ޙުސައިން ފަހުމީ ކުރެއްވި ޕޯސްޓެއްގައި ވިދާޅުވެފައިވަނީ މި ޕްރޮގްރާމުން މުވައްޒަފުންގެ ވިޔަފާރި އަދި ދިރިއުޅުމުގެ ޒިންމާތައް އަދާކުރުމަށް ބޭނުންވާ ހުނަރުތައް އިތުރުވެގެންދާނެ ކަމަށެވެ. އަދި 552 މުވައްޒަފުން މި ޕްރޮގްރާމް ފުރިހަމަކުރުމަކީ ކުންފުނީގެ ތަރައްޤީއާއި ކުރިއެރުމަށް ލިބުނު ވަރަށް ބޮޑު ކާމިޔާބީއެއް ކަމަށްވެސް އޭނާ ވިދާޅުވިއެވެ.
މި ޕްރޮގްރާމް ކާމިޔާބުކަމާއެކު ކުރިއަށް ގެންދިއުމަށް އެހީތެރިވެދެއްވި ފަރާތްތަކަށް ޝުކުރު އަދާކުރައްވަމުން، ޙުސައިން ފަހުމީ ޚާއްޞަ ގޮތެއްގައި ޝުކުރު އަދާކުރެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށާއި، ދިފާޢީ ވަޒީރު، ސިފައިންގެ އެންމެ އިސްވެރިޔާ އަދި އެމްއެންޑީއެފްގެ ލީޑަރޝިޕަށެވެ.
