ދިވެހިރާއްޖޭގައި ހަށިވިއްކުމުގެ ވިޔަފާރީގައި ޝާމިލުވި 6 ބިދޭސީން ޑީޕޯޓުކޮށްފައިވާކަމަށް މޯލްޑިވްސް އިމިގްރޭޝަނުން މިއަދު ހާމަކޮށްފިއެވެ. މި މަޢުލޫމާތު ހާމަކޮށްފައިވަނީ އިމިގްރޭޝަނުން ސޯޝަލް މީޑިއާގައި ކުރި ޕޯސްޓެއްގައެވެ.
އިމިގްރޭޝަނުން ވިދާޅުވި ގޮތުގައި، މި އޮކްޓޯބަރު މަހު އިމިގްރޭޝަނާއި ފުލުހުން ގުޅިގެން ހިންގި ޚާއްޞަ އިންސްޕެކްޝަންތަކެއްގައި ހަށިވިއްކުމުގެ ވިޔަފާރިއާ ގުޅުންހުރި 5 މައްސަލައެއް ފާހަގަކުރެވުނެވެ. މި މައްސަލަތަކާ ގުޅިގެން 7 އަންހެން ބިދޭސީންނާއި، އެޖެންޓުންގެ ގޮތުގައި މަސައްކަތްކުރަމުންދިޔަ 2 ފިރިހެން ބިދޭސީން ވަނީ އިމިގްރޭޝަނުގެ ބެލުމުގެ ދަށަށް ގެނެވިފައެވެ.
މި މައްސަލަތައް ތަޙުޤީޤުކުރުމަށްފަހު، 5 އަންހެނުންނާއި 1 ފިރިހެނަކު ވަނީ ރާއްޖެ އަނބުރާ ނާދެވޭގޮތަށް ޑީޕޯޓުކޮށްފައެވެ. އަދި އިތުރު 3 ބިދޭސީން ޑީޕޯޓުކުރުމުގެ މަސައްކަތް މިހާރު ކުރިއަށްދާކަމަށް އިމިގްރޭޝަނުން މަޢުލޫމާތު ދީފައިވެއެވެ.
ބިދޭސީންގެ މައްސަލަ ޙައްލުކުރުމަށް ސަރުކާރުން މުޅި ރާއްޖެ ހިމެނޭގޮތަށް ޚާއްޞަ މަސައްކަތްތަކެއް ކުރަމުންދާކަން ފާހަގަކުރެވެއެވެ. މިގޮތުން އަތޮޅުތެރޭގެ ރަށްރަށުގައިވެސް މިފަދަ އޮޕަރޭޝަންތައް ހިންގަމުންދެއެވެ. އެގޮތުން، ކ. ގުރައިދޫއިން ގަވާއިދާ ޚިލާފަށް އުޅެމުންދިޔަ 39 ބިދޭސީން ވަނީ އިމިގްރޭޝަނުގެ ބެލުމުގެ ދަށަށް ގެނެވިފައެވެ.
ސަރުކާރުގެ އަމާޒަކީ ކުރިއަށް އޮތް 3 އަހަރުގެ ތެރޭގައި ރާއްޖެއަށް ކުރިމަތިވެފައިވާ އެންމެ ބޮޑު އެއް މައްސަލަ ކަމުގައިވާ ބިދޭސީންގެ މައްސަލައަށް ދާއިމީ ޙައްލެއް ހޯދުމެވެ. މިކަމަށްޓަކައި، ގަވާއިދާ ޚިލާފަށް ރަށްރަށުގައި އުޅެމުންދާ ބިދޭސީން ހޯދައި، އެ ފަރާތްތަކުގެ މަޢުލޫމާތު އެއްކުރުމުގެ މަސައްކަތް ސަރުކާރުން ދަނީ ކުރަމުންނެވެ.
