ކުށްމަދު އަމާން ރައްކާތެރި މުޖުތަމައެއް ބިނާކުރުމަށްޓަކައި ފަރުދީގޮތުން އަދާކުރެވިދާނެ ޒިންމާ އަދާކުރުމަށް ސަރުކާރުގެ އޮފީސްތަކާއި ކުންފުނިތަކުގެ މުވައްޒަފުން ހޭލުންތެރިކުރުވުމަށް ކުރިއަށްގެންދާ 'އަރުތަ' ޕްރޮގްރާމް ވ. އަތޮޅުގެ ތިން ސްކޫލެއްގެ މުވައްޒަފުންނަށް ކުރިއަށް ގެންގޮސްފިއެވެ.
ޕަބްލިކް ޓްރަސްޓް އެންޑް ކޮންފިޑެންސް މެނޭޖްމަންޓާއި ވ. އަތޮޅު ފުލުހުން ގުޅިގެން މި މަހު 25 އިން 26 އަށް މި ޕްރޮގްރާމް ކުރިއަށް ގެންގޮސްފައިވަނީ ވ. އަތޮޅު ތައުލީމީ މަރުކަޒާއި ވ. އަތޮޅު މަދަރުސާ އަދި ފެލިދޫ ސްކޫލުގެ މުވައްޒަފުންނަށެވެ.
ފުލުހުން ބުނީ ކެޔޮދޫގައި ކުރިއަށް ގެންދިޔަ މި ޕްރޮގްރާމުގައި، ދިރިއުޅުމުގެ އަދަބުތަކާއި އޮފީސް މާހައުލުގައި ދިމާވާ ކަންކަމާ ކުރިމަތިލައި މައްސަލަތައް ހައްލުކުރުމަށް މަސައްކަތްކުރާނެ ގޮތުގެ މައުލޫމާތުދީފައިވާ ކަމަށެވެ.
އަދި ލީޑަރޝިޕް ހުނަރުތަކާއި އޮފީސް މާހައުލުގައި ކުރިމަތިވާ ކަންކަމުގެ ސަބަބުން އަމިއްލަ ނަފުސަށް ލިބޭ ހާސްކަމާއި ކުރެވޭ ފިކުރުތަކުން ފަސޭހަކަމާއެކު ދުރަށްދާނެ ގޮތްތަކުގެ މައުލޫމާތު ވެސް ހިއްސާކޮށްފައިވާ ކަމަށާއި ދިރިއުޅުމުގައި ދިމާވާ އެކި ކަންކަމުގައި ގޮތް ނިންމަން ފަސޭހަވާނެ ގޮތްތަކާއި ނިންމުންތައް ނިންމާއިރު ވިސްނަންޖެހޭ ކަންކަމާ ގުޅޭގޮތުން ވެސް މައުލޫމާތު ހިއްސާކޮށްފައިވެއެވެ.
މީގެއިތުރުން، ދަރީން ތަރުބިއްޔަތުކުރުމުގައި ސަމާލުކަންދޭންޖެހޭ ކަންކަމާއި ނަމޫނާ ބެލެނިވެރިޔަކަށްވުމަށް، ބެލެނިވެރިޔާގެ ކިބައިގައި ހުންނަންވާނެ ސިފަތަކާއި ދަރީންގެ މެދުގައި ގެންގުޅޭ ތަފާތު ކުރުންތައް ނައްތާލުމާ ގުޅޭގޮތުން ވެސް މައުލޫމާތު ހިއްސާކޮށްފައިވެއެވެ. ހަމައެހެންމެ، އެއްބަޔަކު އަނެއް ބަޔަކާ މުއާމަލާތުކުރުމުގައި ސަމާލުކަންދޭންޖެހޭ ކަންކަމާއި މުޖުތަމައުގައި ޒިންމާދާރު ބަޔަކަށްވުމަށް މަސައްކަތްކުރާނެ ގޮތްތަކުގެ އިތުރުން، އެކި ގޮތްގޮތުން ކުރިމަތިވާ ނޭދެވޭ ކަންކަމުން ރައްކާތެރިވުމަށް މަސައްކަތްކުރާނެ ގޮތްތަކުގެ މައުލޫމާތު ވެސް ހިއްސާކޮށްފައިވާ ކަމަށްވެސް ފުލުހުން ބުންޏެވެ.
ފުލުހުން ބުނީ ގެވެށި އަނިޔާ ހުއްޓުވުމުގެ ގާނޫނާއި ޖިންސީ ފުރައްސާރަކުރުމާއި ގޯނާކުރުން ހުއްޓުވުމުގެ ގާނޫނާއި އެފަދަ އެކަމެއް ދިމާވެއްޖެނަމަ އަމަލުކުރާނެ ގޮތްތަކުގެ އިތުރުން، އެއްގަމު ދަތުރުފަތުރުގެ ގާނޫނާއި ގަވާއިދުތަކާއި އެއްގަމު އުޅަނދު ދުއްވުމުގައި ހާއްސަ ސަމާލުކަމެއް ދޭންޖެހޭ ކަންކަމުގެ މައުލޫމާތު ވެސް ދީފައިވާ ކަމަށެވެ.
ތިން ސްކޫލު ހިމެނޭހެން 84 ބައިވެރިންނާއެކު ކުރިއަށް ގެންދިޔަ މި ޕްރޮގްރާމް ނިންމައިލާފައިވަނީ މުވައްޒަފުންގެ މެދުގައި ގުޅުން ބަދަހިކޮށް އެކުވެރިކަން އާލާކުރުމަށް ކުރިއަށް ގެންދިޔަ ޓީމް ބިލްޑިންގ ހަރަކާތްތަކަކާ އެކުގައެވެ.
