ރާއްޖެއަށް ވަގަށް އެތެރެކުރަން އުޅެނިކޮށް ގިނަ އަދަދެއްގެ ސިނގިރޭޓް މޯލްޑިވްސް ކަސްޓަމްސް ސަރވިސްއިން އަތުލައިގެންފިއެވެ.
ކަސްޓަމްސްއިން އެކްސްގައި ނެރެފައިވާ ބަޔާނުގައި ބުނެފައިވަނީ ހޯކްސް ޕްރައިވެޓް ލިމިޓެޑްގެ އެޖެންޓްކަމުގެ ދަށުން މިދިޔަ ބުރާސްފަތި ދުވަހު ރާއްޖެ އައި "އެމް.ޓީ ހޯކްސް ޖަވާހިރު" ނަމަކަށް ކިޔާ ބޯޓަކުން ގިނަ އަދަދެއްގެ ސިނގިރޭޓް އެތެރެކުރަން އުޅުނުކަމުގެ މައުލޫމާތު ލިބުނުކަމަށެވެ.
އަދި އެ އެ މައުލޫމާތާއި ގުޅިގެން ހިންގި ހާއްސަ އޮޕަރޭޝަނެއްގައި ވަގަށް ރާއްޖެ އެތެރެކުރި ގިނަ އަދަދެއްގެ ސިނގިރޭޓް އަތުލައިގެންފައިވާކަމަށް ބަޔާނުގައިވެއެވެ.
އެ އިދާރާއިގެ ބަޔާނުގައި އިތުރަށް ބުނެފައިވަނީ އެމް.ޓި ހޯކްސް ޖަވާހިރު ބޯޓުން ހޯކްސް ޕްރައިވެޓް ލިމިޓެޑްގެ ދޯންޏެއް ކަމަށްވާ "ހޯކްސް ރޯދި" އަށް އެތަކެތި އަރުވައިގެން ތިލަފުއްޓަށް ގެންދިޔަ ކަމަށާއި އެތަނުން އެ ކުންފުނީގެ ނަމުގައި ރަޖިސްޓްރީކޮށްފައިވާ ޓްރަކަކަށް އަރުވާފައިވާކަމަށެވެ. އަދި ތިލަފުށީގައި ހުންނަ ހޯކްސްގެ ބޯޓުޔާޑަށް އެތަކެތި ބޭލުމަށް މަސައްކަތްކޮށްފައިވަނީ މި މަހުގެ 25ވަނަ ދުވަހުގެ ރޭ 10:00 ހާއިރު ކަމަށްވެސް ބުންޏެވެ.
އަދި ހޯކްސް ބޯޓްޔާޑް ބަލައިފާސްކުރުމުން، އެ ތަނުގައި ހުރި އެކޮމަޑޭޝަނުންނާއި ވޯކްޝޮޕުން މެންޗެސްޓާ ބްރޭންޑުގެ ސިނގިރޭޓު (ގާތްގަނޑަކަށް 1.695 މިލިއަން ސިނގިރޭޓް ސްޓިކްސް) ވަނީ ފެނިފައިވާ ކަމަށްވެސް އެ އިދާރާއިގެ ބަޔާނުގައި ބުންޏެވެ.
ހަމައެއާއެކު މި ސިނގިރޭޓްތައް މިހާރު ވަނީ ކަސްޓަމްސްގެ ބެލުމުގެ ދަށަށް ގެނެނެވިފައި ކަމަށާއި މި މައްސަލަ އިދާރާއިން އިތުރަށޤ ތަހުގީގު ކުރަމުންދާ ކަމަށްވެސް ބަޔާނުގައި ބުނެފައިވެއެވެ.
