ނ. ކެނދިކުޅުދޫ ސްކޫލުގެ ދަރިވަރުންނަށް ގަނާކުރުމުގެ ނޭދެވޭ އަސަރުތަކާ ބެހޭ ގޮތުން މައުލޫމާތު ދިނުމުގެ ޚާއްޞަ ކުލާހެއް ބާއްވައިފިއެވެ.
މި ކުލާސް ބޭއްވީ ދިވެހި ފުލުހުންގެ ޚިދުމަތުން ސްކޫލުތަކުގެ ދަރިވަރުން ކުށުން ދުރުހެލިކުރުވައި ހޭލުންތެރިކޮށް މައުލޫމާތު ދިނުމަށް ކުރަމުންދާ މަސައްކަތްތަކުގެ ތެރެއިންނެވެ. މި އޮކްޓޫބަރު މަހުގެ 27 ވަނަ ދުވަހު ބޭއްވުނު މި ކުލާހުގައި ބައިވެރިވެފައިވަނީ ކެނދިކުޅުދޫ ސްކޫލުގެ ގްރޭޑް 7 އިން 10 އަށް ކިޔަވަމުންދާ ދަރިވަރުންނެވެ. މި ކުލާހުގައި ދަރިވަރުންނަށް ގަނާކުރުމުގެ މައްސަލަތަކުން ދުރުހެލިވުމުގެ މުހިންމުކަމާއި، އެފަދަ ޢަމަލުތަކުގެ ސަބަބުން ކުރިމަތިވެދާނެ ނޭދެވޭ ނަތީޖާތަކާ ބެހޭގޮތުން މައުލޫމާތު ދެވުނެވެ.
ކުލާހުގައި މައުލޫމާތު ދެއްވި ބޭފުޅުން ވަނީ ސްކޫލު މާހައުލާއި އެހެނިހެން ތަންތަނުގައިވެސް ގަނާކުރުމުގެ އެއްވެސް ޢަމަލެއް ނުހިންގުމަށް ދަރިވަރުންނަށް އިލްތިމާސްކޮށްފައެވެ. އަދި އެފަދަ ކަމެއް ހިނގަމުންދާ މަންޒަރެއް ފެނިއްޖެނަމަ އެކަމެއް ހުއްޓުވުމަށް މަސައްކަތްކުރެވިދާނެ ގޮތްތަކާ ބެހޭގޮތުންވެސް މައުލޫމާތު ދެވުނެވެ.
މީގެ އިތުރުން، ދަރިވަރުންނަށް އިސްލާމީ ރިވެތި އަޚްލާޤާއި، އެއްކުއްޖަކު އަނެއްކުއްޖަކަށް އިޙްތިރާމުކުރުމުގެ މުހިންމުކަމާއި، އަމިއްލަ ނަފުސަށް އިތުބާރުކުރުމާއި، އަދަބު އަޚްލާޤު ހިފެހެއްޓުމުގެ މުހިންމުކަމާ ބެހޭގޮތުންވެސް ނަސޭހަތްތެރިވެ މައުލޫމާތު ދެވުނެވެ. އަދި މުޢާމަލާތުކުރުމުގައި ރިވެތި ބަސްމަގު ބޭނުންކުރުމަށާއި ދަރިވަރުން އެކުވެރިކަމާއެކު ގުޅިގެން އުޅުމަށްވެސް ބާރުއެޅުނެވެ.
މި ކުލާހަކީ ނ. އަތޮޅު ފުލުހުންނާއި ކެނދިކުޅުދޫ ޕޮލިސް އަދި ކެނދިކުޅުދޫ ސްކޫލު ގުޅިގެން ކުރިއަށްގެންދިޔަ ޕްރޮގްރާމެކެވެ. މިއީ ނ. އަތޮޅުގައި ކުށް މަދުކުރުމަށް ހިންގޭ ޕްރޮގްރާމުގެ ތެރެއިން ކުރިއަށް ގެންދެވުނު ޙަރަކާތެކެވެ.
