ނޯމަލް އިމިއުނޯގްލޮބިއުލިން އައިވީ ބޭހެއްގައި ކޮލިޓީގެ މައްސަލައެއް އުޅޭތީ އެކަމަށް ސަމާލުވާން މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން މިއަދު އެދިއްޖެ އެވެ.
އެމްއެފްޑީއޭ ކޮށްފައިވާ އިއުލާނުގައި ބުނީ އިންޑިއާގެ ބޭސް އުފައްދާ ކުންފުންޏެއް ކަމަށްވާ "އައިކޯ ބަޔޮލޮޖިކަލްސް" އިން އުފައްދާ އައިވީ ބޭހެއްގެ ބެޗްތަކަކުން ކޮލިޓީގެ މައްސަލައެއް ފެނިފައިވާތީ ސްރީލަންކާގެ ނޭޝަނަލް މެޑިސިން ރެގިއުލޭޓަރީ އޮތޯރިޓީ އާއި ދުނިޔޭގެ ސިއްހަތު ޖަމިއްޔާ އިން އެކަން ރިޕޯޓު ކޮށްފައިވާ ކަމަށެވެ.
މި ބަޔާނުގައި އިތުރަށް ބުނެފައި ވަނީ މައްސަލަ އުޅޭ ބެޗުގެ ބޭސް ރާއްޖެއަށް އެތެރެކޮށްފަައިވާ ނުވާ ކަމަށެވެ. އަދި ބޭސް އުފެއްދި ކުންފުންޏަކީ ރާއްޖެއަށް ބޭސް އިމްޕޯޓް ކުރުމާއި ވިއްކުމަށް ހުއްދަ އޮންނަ ލިސްޓުގައި ހިމެނޭ ކުންފުންޏެއް ނޫން ކަމަށް އެމްއެފްޑީއޭ އިން ބުންޏެވެ.
މައްސަލަ ކުރިމަތިވެފައިވާ ބެޗުގެ ބޭސް ރާއްޖެ އެތެރެކޮށްފައި ނުވިނަމަވެސް، ދިވެހިންނަކީ އިންޑިޔާ އާއި ލަންކާއިން ސިއްހީ ހިދުމަތް ހޯދާ ބަޔަކަށްވާތީވެ މިކަމަށް ސަމާލުވުމަކީ މުހިއްމު ކަމެއް ކަމުގައި އެމްއެފްޑީއޭ ނޫސްބަޔާނުގައި ބުނެފައިވެއެވެ.
