ފަރުމަހުގެ މަސްވެރިކަން ކުރާ ފަރާތްތަކަށް ދިނުމަށް ހުޅުވާލި ލޯނު ސްކީމުގެ ދަށުން 62 ފަރާތަކަށް ލޯނު ދިނުމަށް ސަރުކާރުން ނިންމަވައިފިއެވެ.
އެސްއެމްވީ ބޭންކް މެދުވެރިކޮށް ދޫކުރުމަށް ހަމަޖެހިފައިވާ މި ލޯނަށް އެދި 121 ފަރާތަކުން ކުރިމަތިލިއެވެ. އެކަމަކު އިވެލުއޭޝަނަށްފަހު ލޯނަށް ޝަރުތު ހަމަވީ 62 ފަރާތެވެ.
މި ލޯނު ހަމަޖެހުނު ފަރާތްތަކާއެކު ބޭއްވި ބައްދަލުވުމުގައި، މަސްވެރިކަމާއި ކަނޑުގެ ވަސީލަތްތަކާއިބެހޭ ވަޒީރު އަހުމަދު ޝިޔާމް ވިދާޅުވީ، މި ސިނާޢަތް ތަރައްޤީ ކުރުމަކީ ސަރުކާރުން ވަރަށް އިސްކަމެއް ދީގެން ކުރަމުންދާ މަސައްކަތެއްކަމަށެވެ. އެގޮތުން ރާއްޖޭގެ ފަތުރުވެރިކަމުގެ ދާއިރާގައި ފަރުމަހުގެ މަސްވެރިކަމަށް ބޮޑު މާކެޓެއް އޮތްކަން ވަޒީރު ފާހަގަކުރެއްވިއެވެ.
ފަރުމަހުގެ މަސްވެރިކަމުގެ ލޯނު ދިނުމަށް ހަމަޖެހިފައި ވަނީ 4 ދާއިރާއަކުންނެވެ. އެއީ އުޅަނދު އަލަށް ބަނުމަށް ނުވަތަ ގަތުމަށް، ފަރުމަހުގެ މަސްވެރިކަން ކުރާ އުޅަނދު މަރާމާތުކުރުމާއި އިތުރު ބަދަލު ގެނައުމަށް އަދި ފަރުމަހުގެ މަސްވެރިކަން ކުރާ އުޅަނދުގައި އިންޖީނު އެޅުމަށާއި ފަރުމަހުގެ މަސްވެރިކަމަށް ބޭނުންވާ ވަސީލަތްތައް ގަތުމަށެވެ.
ފަރުމަހުގެ މަސްވެރިކަމަށް ދޫކުރާ މި ލޯނު، 7 ލައްކަ ރުފިޔާއާ ހަމައަށް ރަހުނު ނުބަހައްޓާ ނެނގޭނެއެވެ. ލޯނު އަނބުރާ ދައްކަން ފަށަން ޖެހެނީ 6 މަސް ދުވަހުގެ ގްރޭސް ޕީރިއަޑަކަށްފަހުއެވެ.
