އެރިކް ޓެންހާގް, މެންޗެސްޓާ ޔުނައިޓެޑުގެ ކޯޗުކަމުގެ މަގާމުން ވަކިކޮށްފިއެވެ.
ޓެންހާގް, ޔުނައިޓެޑުގެ ކޯޗު ކަމުގެ މަގާމުން ވަކިކޮށްފައި މި ވަނީ އިއްޔެ އިނގިރޭސި ޕްރިމިއާ ލީގުގައި ވެސްޓްހަމް އަތުން 2-1 އިން ބަލިވި މެޗަށް ފަހުއެވެ.
ޓެންހާގްގެ އިރުޝާދުގެ ދަށުން ކުޅެމުން އައި ޔުނައިޓެޑު މި ސީޒަނުގައި ދައްކަމުން އައިސްފައިވަނީ ދަށަ ފެންވަރެއްގެ ކުޅުމެކެވެ. އެ ޓީމު އޮތީ ޕްރިމިއާ ލީގުގައި ކުޅުނު 9 މެޗުން ލިބުނު 11 ޕޮއިންޓާއެކު ތާވަލުގެ 14 ވަނައިގައެވެ. އޭގެ އިތުރުން ޔޫރޮޕާ ލީގުގައި އެ ޓީމު އޮތީ, ކުޅުނު 3 މެޗުން ވެސް އެއްވަރުވެ, ތާވަލުގެ 21 ވަނައިގައެވެ.
2022 ވަނަ އަހަރު ޔުނައިޓެޑުގެ ކޯޗު ކަމުގެ މަގާމާ ހަވާލުވި ޓެންހާގްގެ ދައުރަކީ އުސްމިންތަކަށްވުރެ އަޑިގުޑަންތައް ގިނަ ދައުރެކެވެ. ޔުނައިޓެޑަށް ޓެންހާގް 2 ތަށި ކާމިޔާބު ކޮށްދިން ކަމުގައިވިޔަސް, އޭނާގެ އިރުޝާދުގެ ދަށުގައި ޓީމު އޮތް އިރު, އެ ކްލަބުގެ އެތައް ނަން މަޝްހޫރު ކުޅުންތެރިންނަކާ ވަނީ މައްސަލަ ޖެހިފައެވެ.
އޭގެ އިތުރުން ޕްރިމިއާ ލީގުގައި ޓެންހާގަށް ވަނީ އޭނާ ހޭދަކުރި 2 ސީޒަނުގައި ވެސް ރަނގަޅު ނަތީޖާއެއް ނެރެވޭ ގޮތް ނުވެފައެވެ. ފުޓުބޯޅަ ބަލާ ފަރާތްތަކުން ޔުނައިޓެޑު ބޮޑު "ޖޯކެއް" ގޮތުގައި ދެކެނީ ޓެންހާގްގެ ސަބަބުން ކަމަށް ބުނެ, އޭނާ ކްލަބުން ނެރެން އެ ކްލަބުގެ ސަޕޯޓަރުން ގޮވާލަމުން އަންނަތާ އެތައް ދުވަހެއް ފާއިތުވެއްޖެއެވެ.
ޓެންހާގް, ޔުނައިޓެޑުގެ ކޯޗު ކަމުން ވަކިކުރުމާއެކު އޭނާގެ ބަދަލުގައި ކްލަބުގެ ހުންގާނުގައި ވަގުތީ ގޮތުން ހިފުމަށް ހަމަޖެހިފައިވަނީ ކްލަބުގެ ކުރީގެ އެސިސްޓެންޓް ކޯޗު, ރޫޑް ވެން ނިސްލްރޯއީއެވެ.
