ބްރެޒިލްގެ ކްލަބެއް ކަމުގައިވާ ކްރޫޒޭރޯގެ ސަޕޯޓަރުންނަށް ބަޔަކު ހަމަލާދީ, އެކަކު މަރާލައިފިއެވެ.
ބްރެޒިލްގެ ސައު ޕޯލޯގައި އާދިއްތަ ދުވަހު ހިންގި މި މާރާމާރީގައި އެކަކު މަރުވިއިރު 12 މީހަކު ވަނީ ޒަހަމްވެފައެވެ.
މި މާރާމާރީ ހިނގާފައިވަނީ ކްރޫޒޭރޯގެ ސަޕޯޓަރުން އެ ކްލަބުގެ މެޗެއް ބަލާ ނިންމުމަށްފަހު އެނބުރި ގެއަށް ދިޔަ މަގުމަތީގައެވެ. މި މާރާމަރީ ހިންގި ފަރާތްތަކުން ވަނީ ބަހެއްގައި ރޯކޮށްލާ, ކްރޫޒޭރޯގެ ސަޕޯޓަރުންނަށް މުގުރުބުރިން ހަމަލާ ދީފައެވެ.
ސައު ޕޯލޯގެ ޕަބްލިކް ސެކިއުރިޓީ ސެކްރެޓޭރިއަޓް ވިދާޅުވި ގޮތުގައި މި މާރާމާރީ ހިންގާފައިވަނީ ކްރޫޒޭރޯގެ ވާދަވެރި ދެކޮޅުވެރިކަމެއް އޮންނަ ޕަލްމޭރާސްގެ ސަޕޯޓަރުން ކަމުގައެވެ.
މި ހާދިސާއާ ގުޅިގެން ޕަލްމޭރާސްގެ ފަރާތުން ރަސްމީ ބަހެއް އަދި ލިބިފައެއް ނުވެއެވެ.
