ސްޓޭޓް އިލެކްޓްރިކް ކޮމްޕެނީ (ސްޓެލްކޯ) އިން ކުރިއަށް އޮތް ފަސް އަހަރު ދުވަހަށް އެކުލަވާލާފައިވާ ސްޓްރެޓެޖިކް އެކްޝަން ޕްލޭން އިފްތިތާހުކޮށްފިއެވެ.
މި ޕްލޭން އިފްތިތާހުކޮށްދެއްވީ ސްޓެލްކޯގެ މެނޭޖިންގ ޑިރެކްޓަރު ހުސެއިން ފަހުމީއެވެ.
މި ޕްލޭނުގައި ކުންފުނީގެ ކޯ ވެލިއުސްގެ އިތުރުން 5 ސްޓްރެޓީޖިކް އޮބްޖެކްޓިވް، 19 ސްޓްރެޓިޖިކް ގޯލް، 55 ޓާގެޓް އަދި 96 އެކްޝަން ހިމަނާފައިވާކަމަށް ސްޓެލްކޯއިން މަޢުލޫމާތު ދީފައިވެއެވެ. މި ޕްލޭންގައި ޤައުމުގެ ޔުޓިލިޓީ ޚިދުމަތްތަކުގެ ދާއިރާއަށް ރައީސް ޑރ. މުޙައްމަދު މުޢިއްޒު ކަނޑައަޅުއްވާފައިވާ ސިޔާސަތުތަކާ އެއްގޮތްވާ ގޮތުގެ މަތިން، ކުރިއެރުމާއި ހިންގުމުގެ ދެމެހެއްޓެނިވިކަން ކުރިއަރުވާނެ އޮނިގަނޑުތައް ހިމެނޭނެއެވެ.
މީގެ އިތުރުން، 'ތަރައްޤީގެ ބައިވެރިޔާ' ގެ ނަމުގައި ފުރަތަމަ ފަހަރަށް ސްޓެލްކޯއިން ވަނީ ސްލޯގަންއެއް ވެސް އިފްތިތާހުކޮށްފައެވެ. މި ރަސްމިއްޔާތުގައި ކުންފުނީގެ ކުންފުނީގެ މިޝަން، ވިޝަން އަދި ކޯރ ވެލިއުސްވެސް އިފްތިތާހުކޮށްފައިވެއެވެ.
ޕްލޭން އިފްތިތާހުކުރި ރަސްމިއްޔާތުގައި ވާހަކަދައްކަވަމުން ހުސެއިން ފަހުމީ ވިދާޅުވީ މި ޕްލޭންގެ ސަބަބުން ކުންފުނީގެ ހިންގުން އިތުރަށް ހަރުދަނާވެގެންދާނެ ކަމަށެވެ. ސްޓެލްކޯއިން މަޢުލޫމާތު ދިންގޮތުގައި، މި މަސައްކަތުގައި ކުންފުނީގެ ކަމާބެހޭ ދާއިރާތަކުގެ އިސްވެރިން، ޔުނިޓް ހެޑުން އަދި ދަށުން މަސައްކަތްކުރާ މުވައްޒަފުންގެ ޓީމެއް ވެސް ބައިވެރިވެފައިވާނެއެވެ.
މި ޕްލޭނަކީ ކުރިއަށް އޮތް ފަސް އަހަރުގެ މުއްދަތުގައި ސްޓެލްކޯއިން ހާސިލުކުރަން ބޭނުންވާ ކަންކަން ހިމަނައިގެން އެކުލަވާލާފައިވާ ޕްލޭނެކެވެ. މި ޕްލޭންގެ ސަބަބުން ރާއްޖޭގެ ކަރަންޓާއި ނަރުދަމާ ނިޒާމު އިތުރަށް ތަރައްޤީވެ، ރައްޔިތުންނަށް ދެވޭ ޚިދުމަތުގެ ފެންވަރު މަތިވެގެންދާނެކަމަށް ބެލެވެއެވެ.
