ޑެޕިއުޓީ ޕްރޮސެކިއުޓަރ ޖެނެރަލް (ޕީޖީ) އަލީ ސަމީރު މިއަދު އެ މަގާމުން އިސްތިއުފާ ދެއްވައިފިއެވެ.
ޕްރޮސިކިއުޓަރ ޖެނެރަލްގެ އޮފީހުން ވަނީ އޭނާ އިސްތިއުފާ ދެއްވިކަން ކަށަވަރުކޮށްދެއްވާފައެވެ. ނަމަވެސް އެ މަގާމުން ސަމީރު އިސްތިއުފާ ދެއްވީ ކޮން ސަބަބަކާ ގުޅިގެން ކަމެއް ހާމަކޮށްފައެއް ނުވެއެެވެ.
ސަމީރު އިސްތިއުފާ ދެއްވުމާއެކު، ޑެޕިއުޓީ ޕްރޮސެކިއުޓާ ޖެނެރަލްގެ މަގާމުގައި ހުންނަވާނީ މަހުމޫދު ސަލީމް އެކަންޏެވެ. އެ މަގާމަކީ ޕްރޮސެކިއުޓަރ ޖެނެރަލް އައްޔަން ކުރާ މަގާމެކެވެ.
ސަމީރު ވަނީ 2011 ވަނަ އަހަރުން ފެށިގެން ހައި ކޯޓުގެ ފަނޑިޔާރުކަން ކުރައްވައިފައެވެ. އޭނާ ވަނީ 15 އަހަރަށް ވުރެ ގިނަ ދުވަހު ފަނޑިޔާރުކަން ކުރައްވައިފައެވެ. މީގެއިތުރުން ސަމީރަކީ މިސްރުގެ އަލްއަޒުހަރު ޔުނިވާސިޓީއިން ޝަރީއަތާއި ގާނޫނުގެ ރޮނގުން މަތީ ތައުލީމް ހާސިލް ކުރެއްވުމުގެ އިތުރުން މެލޭޝިޔާގެ އިންޓާނޭޝަނަލް އިސްލާމިކް ޔުނިވާސިޓީން ކޮމްޕަރޭޓިވް ލޯ އިން މާސްޓާސް ޑިގްރީ ހާސިލުކުރައްވާފައިވާ ބޭފުޅެކެވެ.
ޕްރޮސެކިއުޓަރ ޖެނަރަލްގެ އޮފީހުން ވަނީ އެމަނިކުފާނު ޑެޕިއުޓީ ޕްރޮސިކިއުޓަރ ޖެނެރަލްގެ މަގާމުގައި ހުންނަވައި ކޮށްދެއްވި އަގުހުރި ހިދުމަތްތަކުގެ އަގު ވަޒަންކޮށް ޝުކުރު އަދާކުރައްވާފައެވެ.
