"ބިންވެރިޔާ" ސްކީމްގެ ދަށުން ހުޅުމާލޭގެ ދެވަނަ ފިޔަވަހިން ގޯތި ލިބުނު ހުރިހާ ފަރާތްތަކަށް ގޯތި ހަވާލުކޮށް ނިންމައިފިއެވެ.
އެޗްޑީސީން ވިދާޅުވެފައިވަނީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅާ އެއްގޮތަށް ނިމިދިޔަ ސަރުކާރުން މާލޭގެ ރައްޔިތުންނަށް ހުޅުމާލެއިން ދޫކުރަން ނިންމި ހުރިހާ ގޯއްޗެއް ދޫކޮށް ނިންމާފައިވާ ކަމަށެވެ. މިގޮތުން ހުޅުމާލޭގެ ދެވަނަ ފިޔަވަހިން 1,407 ގޯތި މިހާރު ވަނީ ގޯތީގެ ވެރިފަރާތްތަކާ ހަވާލުކޮށްފައެވެ.
ރައީސް މުޢިއްޒު ވަނީ އޮކްޓޯބަރު މަސް ނިމުމުގެ ކުރިން ހުޅުމާލޭ 2 ވަނަ ފިޔަވަހިން ގޯތި ލިބުނު ހުރިހާ ފަރާތަކަށް ގޯތި ހަވާލުކުރައްވާނެ ކަމަށް ވިދާޅުވެފައެވެ.
ރައީސް ޞާލިޙްގެ ސަރުކާރުން ނިންމާފައި އޮތީ ހުޅުމާލޭގެ ދެވަނަ ފިޔަވަހިން 1،407 ގޯތި އަދި ހުޅުމާލޭގެ ތިންވަނަ ފިޔަވަހިން 699 ގޯތި ދޫކުރުމަށެވެ. ގެދޮރުވެރިކަމާ ބެހޭ ވަޒީރު ޑރ. ޢަލީ ޙައިދަރު ވިދާޅުވެފައިވަނީ، ހުޅުމާލޭގެ 3 ވަނަ ފިޔަވަހި ހިއްކައިގެން ގޯތި ހަވާލުކުރުމުގެ މަސައްކަތް ފެށޭނެ ކަމަށް ލަފާކުރެވެނީ މިއަހަރުގެ ނޮވެމްބަރު މަހުގެ ތެރޭގައި ކަމަށެވެ.
"ބިންވެރިޔާ" ސްކީމްގެ ދަށުން ގުޅީފަޅުން ގޯތި ލިބޭ ފަރާތްތަކުގެ ގުރުއަތުލުން އަންނަ އަންގާރަ ދުވަހު ކުރިއަށް ގެންދިޔުމަށް ވަނީ ނިންމާފައެވެ. މި ގުރުއަތުލުން ޕީއެސްއެމްގެ ޔެސް ޓީވީން ވަގުތުން ގެނެސްދިނުމަށް ވަނީ ހަމަޖެހިފައެވެ.
