ބައިނަލް އަގުވާމީ ގޮތުން ފާހަގަކުރާ ސައިބަރ އެވެއާނަސް މަސް ކަމުގައިވާ އޮކްޓޯބަރު މަސް ފާހަގަކުރުމަށް ކުރިއަށް ގެންދާ ހަރަކާތްތަކުގެ ތެރެއިން އައްޑޫ ސިޓީ ބައެއް ސްކޫލުތަކުގެ ދަރިވަރުން ހޭލުންތެރިކުރުވުމަށް މައުލޫމާތުދީފިއެވެ.
އާދީއްދަ ދުވަހު ސްކޫލްތަކުގައި ބޭއްވި ހާއްސަ އެސެމްބްލީގެ ތެރެއިން މައުލޫމާތުދީފައިވަނީ ފޭދޫ ސްކޫލު، މަރަދޫ ސްކޫލް އަދި އިރުޝާދިއްޔާ ސްކޫލުގެ ދަރިވަރުންނަށެވެ.
ފުލުހުން ބުނީ މި ތިން ސްކޫލުގައި ވެސް މައިގަނޑު ގޮތެއްގައި މައުލޫމާތު ފޯރުކޮށްދީފައިވަނީ، ސައިބަރ އެވެއާނަސް މަހަށް ހާއްސަކޮށްގެން ހޭލުންތެރިކަން އިތުރުކުރެވޭ ދާއިރާތަކަށް ފޯކަސް ކުރެވިގެންނެވެ. އެގޮތުން ރައްކާތެރި ޕާސްޕޯޑް ބޭނުންކުރާނެގޮތާއި، ޓޫ ފެކްޓަރ އޮތެންޓިކޭޝަން އެކްޓިވްކުރުމުގެ މުހިންމުކަމާ އަދި އޯޓީޕީއަށް ރައްކާތެރިވުމުގެ މުހިންމުކަމުގެ މައްޗަށް އަލިއަޅުވާލައި މައުލޫމާތުދީފައިވާ ކަމަށެވެ.
މީގެ އިތުރުން، ފޭސްބުކް ވައިބަރ ފަދަ ސޯޝަލް މީޑިއާގެ ވަސީލަތްތައް ހެކްކޮށްގެން ސްކޭމްކުރާ ފަރާތްތަކުގެ ކިބައިން ސަމާލުވުމަށާއި، ފިޝިން ލިންކްސް ފަދަ ގޮތް ނޭނގޭ ލިންކުތަކަށް ނުވަނުމަށް މައުލޫމާތުދީ ހޭލުންތެރިކޮށްފައިވާ ކަމަށެވެސް އެ ހިދުމަތުން ބުނެފައިވެއެވެ.
