ރޭގައި ބޭއްވި ބަލޮންޑޯ ސެރެމޮނީގައި އެންމެ މޮޅު 21 އަހަރުން ދަށުގެ ކުޅުންތެރިޔާއަށް ދިން "ކޮޕާ އެވާޑް" ހާސިލުކޮށް, އެ އެވާޑު ހާސިލުކުރި އެންމެ އުމުރުން ހަގު ކުޅުންތެރިޔާއަށް ލަމީން ޔަމާލް ވެއްޖެއެވެ.
އުމުރުން އެންމެ 17 އަހަރުގައި ޔަމާލް މި އެވޯޑު ހާސިލުކުރިއިރު, އޭނާއަކީ ފާއިތުވެދިޔަ ހަތަރު އަހަރު ތެރޭގައި ބާސެލޯނާއިން ކޮޕާ އެވޯޑު ހާސިކުރި ތިންވަނަ ކުޅުންތެރިޔާއެވެ. ޔަމާލްގެ ކުރިން 2021 ވަނަ އަހަރު ޕެޑްރީ, އަދި 2022 ވަނަ އަހަރު ގަވީ ވަނީ މި އެވޯޑު ހާސިލުކޮށްފައެވެ.
ކޮޕާ އެވޯޑު ހާސިލުކުރުމުގެ އިތުރުން ޔަމާލް ވަނީ ބަލޮންޑޯ ރޭންކިންގެ 8 ވަނަ ހޯދާފައެވެ. އެއާއެކު އޭނާ ވަނީ ބަލޮންޑޯ ރޭންކިންގްސްގެ ގަދަ ދިހައެއްގައި ހިމެނުނު އެންމެ ހަގު ކުޅުންތެރިޔާއަށް ވެފައެވެ.
މި ކާމިޔާބީއާ ބެހޭ ގޮތުން ވާހަކަދައްކަމުން ޔަމާލް ބުނީ އޭނާގެ ހުވަފެނަކީ, 21 އަހަރުގައި ބަލޮންޑޯ ހާސިލުކޮށް, އެ އެވޯޑު ހާސިލުކުރި އެންމެ ޒުވާން ކުޅުންތެރިޔާގެ މަގާމު ހޯދާފައިވާ ބްރެޒިލްގެ ރޮނަލްޑޯ ނަޒާރިއޯގެ ރެކޯޑު މުގުރާލުން ކަމުގައެވެ.
ޒުވާން އުމުރެއްގައި ފުޓުބޯޅަ ދުނިޔޭގައި ވިދަމުން އަންނަ ލަމީން ޔަމާލް މި ސީޒަނުގައި ވެސް އަންނަނީ ތަފާތު ކުޅުމެއް ދައްކަމުންނެވެ. އޭނާ ވަނީ މި ސީޒަނުގައި ކުޅުނު 14 މެޗުގައި 6 ލަނޑު ކާމިޔާބު ކޮށް 7 އެސިސްޓް ފޯރުކޮށްދީފައެވެ.
