އާޓިފިޝަލް އިންޓެލިޖަންސް ޑްރައިވިންގް ނުވަތަ އަމިއްލައަށް ދުވާ ޓެކްނޮލޮޖީއަށް ޓޮޔޯޓާ މޮޓޯސްއިން 3 ބިލިއަން ޑޮލަރު ހޭދަކުރަން ނިންމައިފިއެވެ.
ޓޮޔޯޓާ މޮޓޯސްއިން މި ޓެކްނޮލޮޖީ ކުރިއެރުވުމަށް ކުރާ މަސައްކަތަކީ ޖަޕާނުގެ ނިޕޮން ޓެލެގްރާފް އެންޑް ޓެލެފޯން (އެންޓީޓީ) އާ ގުޅިގެން ކުރެވިގެންދާ މަސައްކަތެކެވެ. ދެ ކުންފުނިން ގުޅިގެން އަމިއްލައަށް ވެހިކަލް ދުއްވާ ޓެކްނޮލޮޖީ ދިރާސާކޮށް, އެ ޓެކްނޮލޮޖީ ކުރިއެރުވުމަށް ކުރާ މަސައްކަތަށް 500 ބިލިއަން ޔެން ނުވަތަ 3.26 ބިލިއަން ޑޮލަރު ހޭދަކުރުމަށް ވަނީ ނިންމާފައެވެ.
ރިޕޯޓުތަކުން ބުނާ ގޮތުގައި ޓޮޔޯޓާ އާއި އެންޓީޓީގެ ދިރާސާތަކުގެ މައިގަނޑު އަމާޒަކީ ވެހިކަލްއެއް އެކްސިޑެންޓްވާން އުޅޭ ނަމަ އެ ދަނޑިވަޅުގައި އަމިއްލައަށް ވެހިކަލް ސަލާމަތުގެ އައްސޭރިއަށް ގެންދެވޭނެ ފެންވަރުގެ ސޮފްޓްވެއާއެއް ބިނާ ކުރުމެވެ.
ދެ ކުންފުނީގެ އަމާޒަކީ 2028 ވަނަ އަހަރު މި ފަދަ ސޮފްޓްވެއާއެއް ތައާރަފުކޮށް, ވެހިކަލް އުފައްދާ އެހެން ކުންފުނިތަކަށް ފޯރުކޮށްދިނުމެވެ.
