ރައްޔިތުންގެ މަޖިލީހަށް ހުށަހެޅި 5.1 ބިލިޔަން ރުފިޔާގެ ސަޕްލިމެންޓަރީ ބަޖެޓު މިއަދު ރައްޔިތުންގެ މަޖިލީހުން ފާސްކޮށްފިއެވެ.
މި ބަޖެޓު ފާސްވީ ވޯޓުގައި ބައިވެރިވި 75 މެންބަރުންގެ އަޣުލަބިއްޔަތުންނެވެ. ދެކޮޅަށް ވޯޓު ދެއްވީ 11 މެންބަރުންނެވެ.
ސަރުކާރުން މި ސަޕްލިމެންޓަރީ ބަޖެޓު ހުށަހެޅި ސަބަބަކީ މި އަހަރަށް ކުރިން ފާސްކޮށްފައިވާ 49.8 ބިލިއަން ރުފިޔާގެ ބަޖެޓުން ދައުލަތުގެ ޚަރަދުތައް ހަމަޖައްސަން ދަތިވުމެވެ. މި ސަޕްލިމެންޓަރީ ބަޖެޓުގެ ޖުމްލަ ޢަދަދަކީ 5،119،508،129 ރުފިޔާއެވެ.
ބަޖެޓުގެ ތަފްޞީލަށް ބަލާއިރު، ރިކަރަންޓް ޚަރަދުގެ ގޮތުގައި 1.5 ބިލިއަން ރުފިޔާ އަދި ކެޕިޓަލް ޚަރަދުގެ ގޮތުގައި 3.5 ބިލިޔަން ރުފިޔާ ހިމެނެއެވެ. މީގެ ތެރޭގައި ޕީއެސްއައިޕީއަށް 2 ބިލިއަން ރުފިޔާ، ސަބްސިޑީތަކަށް 1 ބިލިއަން ރުފިޔާ، އަދި ކޮންޓިންޖެންސީ ބަޖެޓަށް 650 މިލިއަން ރުފިޔާ ހިމެނެއެވެ.
މި ސަޕްލިމެންޓަރީ ބަޖެޓާއެކު، މި އަހަރުގެ ދައުލަތުގެ ޖުމްލަ ބަޖެޓު 55 ބިލިއަން ރުފިޔާއަށް އަރާފައިވެއެވެ. މިއާއެކު ބަޖެޓު ޑެފިސިޓް 18.4 ބިލިއަން ރުފިޔާއަށް އިތުރުވާނެ ކަމަށް ލަފާކުރެވެއެވެ.
މާލީ ވަޒީރު މޫސާ ޒަމީރު މި ބަޖެޓު މަޖިލީހަށް ހުށަހެޅުއްވީ މިދިޔަ ބުރާސްފަތި ދުވަހުއެވެ. ބަޖެޓު ދިރާސާކުރީ މާލިއްޔަތު ކޮމިޓީއާއި އިޤްތިޞާދީ ކޮމިޓީގެ މެންބަރުންގެ މައްޗަށް އެކުލެވޭ ބަޖެޓު ދިރާސާކުރާ ކޮމިޓީންނެވެ. ކޮމިޓީން ބަޖެޓު ފާސްކޮށްފައިވަނީ ސަރުކާރުން ހުށަހެޅި ގޮތަށް އެއްވެސް ބަދަލެއް ނުގެނެސްއެވެ.
މި ސަޕްލިމެންޓަރީ ބަޖެޓުގެ ސަބަބުން ދައުލަތުގެ ޚަރަދުތައް އިތުރުވި ނަމަވެސް، އާމްދަނީއާއި ހިލޭ އެހީގެ ގޮތުގައި 640 މިލިއަން ރުފިޔާ ލިބޭނެ ކަމަށް އަންދާޒާކޮށްފައިވެއެވެ. މިއީ ޓެކުހުގެ ގޮތުގައި ލިބޭ އާމްދަނީން އިތުރު 61 މިލިއަން، އެހެނިހެން އާމްދަނީގެ ގޮތުގައި 379 މިލިއަން، އަދި ހިލޭ އެހީގެ ގޮތުގައި 199 މިލިއަން ރުފިޔާއެވެ.
