ފެނަކަ ކޯޕަރޭޝަނުން ކަރަންޓުގެ ޚިދުމަތް ފޯރުކޮށްދޭ ހުރިހާ ތަނެއްގައި އާރތު ލީކް ސަރކެޓް ބްރޭކަރ (އީއެލްސީބީ) ހަރުކޮށްފައި ހުރިކަން ކަށަވަރު ކުރުމަށް ސާރވޭއެއް ކުރަން ފަށައިފިއެވެ.
ފެނަކައިން ނެރުނު ބަޔާނެއްގައި ވިދާޅުވެފައިވާ ގޮތުގައި މި ސާރވޭ ކުރިއަށް ގެންދެވޭނީ އާންމުން ދިރިއުޅޭ ގޭބީސީތަކާއި، އޮފީސްތަކާއި، ވިޔަފާރިކުރާ ތަންތަނާއި، އާންމު ސަރަހައްދުތައް ހިމެނޭ ގޮތަށެވެ. އަދި މި ސާރވޭ ކުރިއަށް ގެންދާނީ މި މަހުގެ މީޓަރު ރީޑިންގ ނެގުމަށް ކުރާ ޒިޔާރަތުގައި ފެނަކައިގެ ފަންނީ މުވައްޒަފުންނެވެ.
ފެނަކައިން ވިދާޅުވީ އީއެލްސީބީ ހަރުކޮށްފައި ހުރުމަކީ ކަރަންޓު ބޭނުންކުރުމުގެ ސަލާމަތީ މިންގަނޑުގެ އަސާސީގޮތުން ފުރިހަމަވާންޖެހޭ، ޔުޓިލިޓީ ރެގިޔުލޭޓަރީ އޮތޯރިޓީގެ ޤަވައިދުތަކުން ލާޒިމްކުރާ ކަމެއްކަމަށެވެ. އެހެންކަމުން މި ސާރވޭގައި ހުރިހާ ފަރާތްތަކެއްގެ އެއްބާރުލުން ދިނުމަށް ފެނަކައިން އެދިފައިވެއެވެ.
މި ސާރވޭގެ ސަބަބުން ކަރަންޓުގެ ޚިދުމަތް ބޭނުންކުރާ ފަރާތްތަކުގެ ސަލާމަތާއި ރައްކާތެރިކަން އިތުރުވެގެންދާނެ ކަމަށް ބެލެވެއެވެ. އަދި މިއީ ކަރަންޓުގެ ޚިދުމަތް ފޯރުކޮށްދިނުމުގައި ފެނަކައިން ގެންގުޅޭ މިންގަނޑުތައް ހަރުދަނާކުރުމަށް އަޅާ ފިޔަވަޅެއްގެ ގޮތުގައިވެސް ފާހަގަކުރެވެއެވެ.
