ކ. މާފުށީގެ ކަރަންޓު ވިއުގަ އިތުރަށް ހަރުދަނާކުރުމުގެ ގޮތުން އެރަށުގެ ކަރަންޓު ވިއުގައަށް ބޭނުންކުރާ ދެ ސްޓެޕްއަޕް ޓްރާންސްފޯމަރުގެ ތެރެއިން އެއް ޓްރާންސްފޯމަރު މިހާރު އަޕްގްރޭޑް ކޮށް ނިމިފައިވާކަމަށް ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އިން ވިދާޅުވެއްޖެއެވެ.
ސްޓެލްކޯއިން މަޢުލޫމާތު ދެއްވިގޮތުގައި، އެކުންފުނިން ވަނީ 2000 ކޭވީއޭގެ ޓްރާންސްފޯމަރު 3000 ކޭވީއޭގެ ޓްރާންސްފޯމަރަކަށް ބަދަލުކޮށްފައެވެ. އަދި މި ހަފްތާގެ ތެރޭގައި ދެވަނަ ޓްރާންސްފޯމަރުވެސް 3000 ކޭވީއޭގެ ޓްރާންސްފޯމަރަކަށް ބަދަލުކުރެވިގެންދާނެ ކަމަށް އެ ކުންފުނިން ބުނެފައިވެއެވެ.
މި ދެ ޓްރާންސްފޯމަރު އަޕްގްރޭޑް ކުރުމުގެ މަޤްޞަދަކީ މާފުށީގެ މީޑިއަމް ވޯލްޓޭޖް އަޕްސްޓްރީމް ކެޕޭސިޓީ 10 އެމްވީއޭއަށް އިތުރުކުރުމެވެ. މިކަމުގެ ސަބަބުން މާފުށީގެ ޖެނެރޭޝަން ކެޕޭސިޓީ އިތުރުކުރުމަށް މަގުފަހިވެގެންދާނެ ކަމަށް ސްޓެލްކޯއިން ފާހަގަކޮށްފައިވެއެވެ.
މި މަސައްކަތް ނިމުމުން، މާފުށީގެ ރައްޔިތުންނަށް އިތުރަށް ކަރަންޓުގެ ޚިދުމަތް ފުޅާކޮށް، އިތުބާރުހުރި ގޮތެއްގައި ކަރަންޓުގެ ޚިދުމަތް ފޯރުކޮށްދިނުމަށް މަގުފަހިވެގެންދާނެއެވެ.
