މި ސަރުކާރުގެ ފަސް އަހަރު ތެރޭގައި ރާއްޖޭގައި މަސް ރައްކާކުރެވޭ ޖާގަ 25،000 ޓަނަށް އިތުރުކުރައްވާނެ ކަމަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ.
އިއްޔެ ބޭއްވުނު ރައްޔިތުންގެ މަޖިލީހުގެ ޖަލްސާގައި ހައި ހިތަދޫ ދެކުނު ދާއިރާގެ މެންބަރު އިބްރާހީމް ނާޒިލް ކުރެއްވި ސުވާލަކަށް ޖަވާބު ދެއްވަމުން ވަޒީރު މި މަޢުލޫމާތު ހިއްސާކުރެއްވިއެވެ. ވަޒީރު ވިދާޅުވި ގޮތުގައި މިހާރު ރާއްޖޭގައި މަސް ރައްކާކުރެވޭ ޖާގައަކީ 8،500 ޓަނެވެ.
"އަޅުގަނޑުމެން މިއުޅެނީ އިރާދަކުރެއްވިއްޔާ 250 މިލިޔަން ރުފިޔާގެ މަސް ހުރެއްޖެކަމަށްވަންޏާ އެ މަސްވެސް ސްޓޯރ ކުރެވޭނެ ކެޕޭސިޓީ އިތުރުކުރުމަށް. ދިވެހިރާއްޖޭގެ ސްޓޯރެޖް ކެޕޭސިޓީ އިރާދަކުރެއްވިއްޔާ އަޅުގަނޑުމެންގެ ސަރުކާރު ނިމޭއިރު ހުންނާނީ 25،000 ޓަނަށްވުރެ މަތީގައި،" ވަޒީރު ވިދާޅުވިއެވެ.
