މޯލްޑިވްސް އިންލަންޑް ރެވެނިއު އޮތޯރިޓީ (މީރާ) އާއި ވިލާ ކޮލެޖާ ދެމެދު މިއަދު ފަހުމުނާމާއެއްގައި ސޮއިކޮށްފިއެވެ.
މި ފަހުމުނާމާގެ މަޤްޞަދަކީ ދެ މުއައްސަސާ ގުޅިގެން މަސައްކަތްކުރުމާއި، ދަރިވަރުންނަށް ވަޒީފާގެ ފުރުޞަތުތައް ފަހިކޮށްދިނުމެވެ. މި ފަހުމުނާމާގައި މީރާގެ ފަރާތުން ސޮއިކުރެއްވީ ކޮމިޝަނަރ ޖެނެރަލް އޮފް ޓެކްސޭޝަން ޙަސަން ޒަރީރެވެ. އަދި ވިލާ ކޮލެޖްގެ ފަރާތުން ސޮއިކުރެއްވީ ވައިސް ރެކްޓަރ ޑރ. އަލީ ނަޖީބެވެ.
މީރާއިން މަޢުލޫމާތުގެ ދެއްވި ގޮތުގައި މި ފަހުމުނާމާގެ ދަށުން މީރާއަށް ވިލާ ކޮލެޖުން ހިންގާ ''ކޯޕަރޭޓް އެކްސެސް ޓު ސްޓޫޑެންޓް ޓެލެންޓް'' (ކާސްޓް) ޕްރޮގްރާމްގައި ބައިވެރިވުމުގެ ފުރުޞަތު ލިބިގެންދާނެއެވެ. މި ޕްރޮގްރާމްގެ ތެރެއިން މީރާއަށް ވިލާ ކޮލެޖުގެ މިހާރުގެ ދަރިވަރުންނާއި ގްރެޖުއޭޓުންނާ ބައްދަލުކުރުމުގެ ފުރުޞަތު ލިބިގެންދާނެއެވެ.
މި ބައްދަލުވުންތަކުގައި މީރާއިން ދަރިވަރުންނަށް ކެރިއަރ ގައިޑެންސް ދިނުމާއި، މީރާގައި ހުރި ވަޒީފާގެ ފުރުޞަތުތަކުގެ މަޢުލޫމާތު ހިއްސާކުރުމާއި، މަސައްކަތުގެ މާޙައުލާ މެދު ދަރިވަރުންގެ ޝައުޤުވެރިކަން އިތުރުކުރުމަށް މަސައްކަތްކުރާނެއެވެ. މީގެ ސަބަބުން މީރާއަށް ޤާބިލު މުވައްޒަފުން ހޯދުމަށް ފަސޭހަވެގެންދާނެ ކަމަށް މީރާއިން ވިދާޅުވިއެވެ.
މީގެ އިތުރުން، މި ފަހުމުނާމާގެ ދަށުން ޓެކުހާ ގުޅުންހުރި ދާއިރާތަކުގެ އިލްމީ ދިރާސާތައް ދެ މުއައްސަސާ ގުޅިގެން ކުރިއަށް ގެންދިއުމަށްވެސް މަގުފަހިވެގެންދާނެއެވެ. މި މަސައްކަތުގެ ސަބަބުން ދިވެހިރާއްޖޭގެ ޓެކުހުގެ ނިޒާމު އިތުރަށް ހަރުދަނާވެގެންދާނެ ކަމަށް މީރާއިން އުންމީދުކުރެއެވެ.
