ދިވެހިރާއްޖޭގެ ޓޫރިޒަމާބެހޭ ގާނޫނަށް ސަރުކާރުގެ ފަރާތުން ހުށަހެޅި އިސްލާހެއް ރައްޔިތުންގެ މަޖިލީހުން މިއަދު ފާސްކޮށްފިއެވެ.
މި އިސްލާހުގެ ދަށުން ގްރީން ޓެކްސް ބޮޑުކުރުމަށް ވަނީ ނިންމާފައެވެ.
މައްޗަންގޮޅި ދެކުނު ދާއިރާގެ މެންބަރު މުސްތަފާ ހުސައިން ހުށަހެޅުއްވި މި އިސްލާހު ފާސްކުރުމަށް މަޖިލީހުގެ މިއަދުގެ ޖަލްސާގައި 71 މެންބަރުން ވޯޓު ދެއްވާފައިވާއިރު، އިސްލާހު ފާސްކުރުމާ ދެކޮޅަށް 8 މެންބަރުން ވޯޓު ދެއްވިއެވެ.
މި އިސްލާހުގެ ދަށުން، މީހުން ދިރިއުޅޭ ރަށްރަށުގައި ހިންގާ ހޮޓާތަކާއި ޓޫރިސްޓް ގެސްޓްހައުސްތަކުގެ ތެރެއިން 50 ކޮޓަރި ނުވަތަ އެއަށްވުރެ މަދު އަދަދެއްގެ ކޮޓަރި ރަޖިސްޓަރީ ކޮށްފައިވާ ތަންތަނުގައި ތިބޭ ޓޫރިސްޓުންގެ އަތުން ނަގާ ގްރީން ޓެކްސް މިހާރުގެ ތިން ޑޮލަރުން ހަ ޑޮލަރަށް ބޮޑުކުރުމަށް ވަނީ ފާސްކޮށްފައެވެ.
އަދި ރާއްޖޭގައި ހިންގާ ޓޫރިސްޓް ރިޒޯޓުތަކާއި އިންޓަގްރޭޓަޑް ޓޫރިސްޓް ރިޒޯޓުތަކާއި ރިޒޯޓު ހޮޓާތަކާއި ޓޫރިސްޓް ގެސްޓްހައުސްތަކާއި ޓޫރިސްޓް އުޅަނދުތަކުގައި ޓޫރިސްޓަކު ހޭދަކުރާ ކޮންމެ ދުވަހަކަށް ނަގާ ގްރީން ޓެކްސް މިހާރުގެ ހަ ޑޮލަރުން 12 ޑޮލަރަށް ބޮޑުކުރުމަށްވެސް ވަނީ ފާސްކޮށްފައެވެ.
މި އިސްލާހުގައިވާ ގޮތުން، ގްރީން ޓެކްސްގެ މި އައު ބަދަލަށް އަމަލުކުރަން ފަށާނީ އަންނަ އަހަރުގެ ޖެނުއަރީ މަހުން ފެށިގެންނެވެ.
